Shtriqja bën që macet të ndihen mirë dhe ndihmon në qarkullimin e gjakut, thotë Andrew Cuff, hulumtues në Kolegjin Mbretëror të Veterinarisë në Londër.
Macet flejnë midis 12 dhe 16 orë në ditë, dy herë më gjatë sesa njerëzit, thotë Rubin Naiman, fiziolog mjekësor nga Universiteti në Arizona. Kur njerëzit flejnë, truri paralizon pjesën më të madhe të muskujve, për të parandaluar lëvizjet gjatë gjumit. E njëjta gjë ndodhë edhe me macet gjatë gjumit. Truri paralizon muskujt dhe pamundëson lëvizjet gjatë gjumit të cilat në rastin e tyre, mund të çojnë deri te rënia prej karriges, sipas National Geographic.
Në momentin që zgjohen, macet fillojnë të shtriqen.
Kur macet flejnë, shtypja e gjakut bie, sikurse tek njerëzit. Cuff thotë se macet shtriqen pas gjumit për t’i aktivizuar muskujt pas një periudhe të pasivitetit. Pas aktivizimit të muskujve do të rritet sasia e gjakut që rrjedh në indet e muskujve si dhe në tru. Kjo ndihmon në një zgjim më të shpejtë dhe gjendje ekstra alerti.
Përveç kësaj, sapo fillojnë të shtriqen, muskujt largojnë toksinat dhe materiet tjera të panevojshme të cilat janë formuar gjatë kohës së pushimit.
Ajo që është e veçanërisht e rëndësishme për macet, është se shtriqja përgatit muskujt për aktivitet. Nëse ndonjë mi apo merimangë ndodhet në afërsi, pas shtriqjes macja do të jetë e gatshme për të sulmuar. /tesheshi.com/
