Sakrifica, heqje dorë nga ushqimi, por peshorja vijon të tregojë gjithmonë të njëjtën peshë. Arsyeja nuk është metabolizmi, siç kanë treguar dhe mbështetur deri më sot shumë studime, por mund të jetë një tjetër.
Siç tregohet në një artikull të publikuar nga neuroshkencëtarja Sandra Aamodt në “New York Times”, arsyeja qëndron në mënyrën e edukimit të trurit tonë. Truri dhe stomaku janë vazhdimisht në kontakt, ndaj duhet të mundohemi të kuptojmë arsyet për të cilat, për shembull, përse kemi uri.
“Duhet t’i kushtojmë rëndësi shenjave të urisë dhe të ngopjes, në mënyrë që të nisim të hamë vetëm kur e kërkojnë komandat e sistemit që rregullon peshën në trurin tonë”, – thotë shkencëtarja.
“Mendimi i të ngrënit është një instrument i rëndësishëm për të ruajtur stabilitet në peshë, pa u privuar nga asnjë gjë”, – vijon ajo. Praktikisht, kur jemi në dietë dhe reduktojmë racionet ushqimore, truri merr mesazhin “sikur të jemi duke vdekur për bukë” dhe rrit ndjesinë e urisë në formën e një alarmi.
Sipas shkencëtares, duhet të përqendrohemi tek ushqimi kur jemi në dietë. Ngrënia pa u shpërqendruar, një pushim i vogël nga një kafshatë në tjetrën dhe pregatitja e ushqimit në mënyrë të ngadaltë është shumë e rëndësishme. Në këtë mënyrë do të jemi më të ndërgjegjshëm dhe do të luftojmë me lehtësi ndjesinë e urisë. /tesheshi.com/
