Lestër Siti e ktheu të pamundurën në të mundur muaj më parë, teksa fitoi Premier League-n. E ndërkohë që tani ndjen vështirësi të shumta në kampionatin anglez, në Champions League përsërit përrallën e sezonit të shkuar.
Nëntë pikë në tre takime për Lestër Sitin, që në grupin G të Champions League-s ka tre fitore, pesë gola të shënuar e asnjë të pësuar. E, natyrisht, kryeson në këtë grup. Pas tetë javësh në Premier League, Lestëri ka vetëm tetë pikë, e gjendet në vend të 13-të, me një golavarazh tejet negativ, -6!
Lestër Siti fitoi mbrëmë 1-0 me Kopenhagenin, falë golit të Mahrez-it në minutën e 40-të, dhe kalimin e grupit e ka shumë pranë, mbase duke e siguruar që në ndeshjen e ardhshme.
Rezultati më i thellë i tetë takimeve të së martës së Champions League-s u regjistrua në Madrid, ku Reali fitoi 5-1 ndaj Legias së Varshavës. Gareth Bale shënoi në minutën e 16-të, duke i dhënë fund një periudhe dyvjeçare që nuk realizonte në këtë aktivitet, që nga dhjetori i 2014-s. Marco Asensio qe lojtari i ndeshjes, pasi shënoi dhe një gol në debutimin e tij në Champions.
E çmuar dhe fitorja e Borusias së Dortmundit në Lisbonë ndaj Sportingut. Rezultati 1-2 e mban Borusian në krye të grupit F, me 7 pikë, po aq sa Reali i Madridit.
Juventusi fitoi 0-1 në fushën e Lionit. Buffon u dha përgjigje kritikave të ditëve të fundit, duke pritur një 11-metërsh në pjesën e parë. Torinezët luajtën me dhjetë lojtarë në pjesën e dytë, pasi Lemina doli jashtë me të kuqe në minutën e 54-t.
Në takimet e tjera, CSKA e Moskës dhe Monako barazuan 1-1 mes tyre. Në barazim, por pa gola, përfundoi dhe Bajer Leverkusen – Totenhem. Porto fitoi 1-2 në fushën e Bryzhit; Sevilja gjithashtu u largua nga kryeqyteti kroat me tre pikë pas fitores 0-1 ndaj Dinamos vendase. /tesheshi.com/
