Nga Blendi Gashi
Që nga paslufta ka dyshime serioze se ka pasur keqpërdorime me fondet e luftës, si atë “Vendlindja Thërret” dhe “3 përqindëshi”, dhe për të forcuar këtë u përkujdesën së fundmi dy figura, Xhavit Haliti i PDK-së dhe Anton Quni i LDK-së ku u përplasën për fatin e 8 milion markave.
Paratë e fondit të parë dyshohet të jenë keqpërdorur nga “krahu i luftës”, e të fondit të dytë nga njerëz të ish-qeverisë së përkohshme në krye me Bujar Bukoshin e Isa Mustafën, por jo vetëm.
Për “3 përqindëshin”, Prokuroria e Kosovës nisi hetimet më 2016, për çka u morr në pyetje edhe ish-kryeministri në ekzil, Bujar Bukoshi; por që kjo ishte e gjitha dhe s’pati asnjë veprim tjetër. Ndërsa sa i takon fondit tjetër, atij “Vendlindja Thërret” akoma nuk ka ndonjë nismë hetimore, sado që dyshohet se bëhet fjalë për abuzimet miliardëshe me para të popullit, që është edhe baza e pasurimit të shumë politikanëve kosovarë.
Ndërsa akuzat vetëm sa rriten, shtrohet pyetja: pse përgjegjësit nuk janë kapur as pas dy dekadash nga drejtësia dhe nëse do kapen ndonjëherë?
Analistët politikë shprehin rezervat e tyre sa i përket hetimit të këtyre fondeve dhe kapjes nga drejtësia të njerëzve që keqpërdorën paratë e dedikuara UÇK-së.
Analisti politik Nexhmedin Spahiu nuk optimist se fondet e luftës do hetohen. Përndryshe…
“Hetimi i fondeve çon në zbardhjen e krimeve të luftës, është ABC-ja e nisjes së funksionimit të sistemit të drejtësie në Kosovë. Një sistem i pavarur i drejtësisë duhej të fillonte të hetonte këto fonde dhe të mësohej përfundimisht se ku janë harxhuar paratë e dhëna. Pra duhet të flasë prokuroria për këto fonde ose të formohet edhe një komision hetimor parlamentar”, thotë Spahiu për tesheshi.com.
Edhe analisti tjetër, Fadil Lepaja është skeptik se drejtësia kosovare mund të hetojë rastet e fondeve të dhëna në luftë dhe shton se debatet e tilla plasin me qëllime të caktuara.
“Vështirë se drejtësia kosovare ka kompetencë profesionale dhe ligjore të hetojë rastet e paraluftës dhe luftës, përpos nëse ka të bëjë me krime lufte. Mendoj se këto mundet t’i hetoi drejtësia e vendeve ku kanë qenë të stacionuara qendrat e fondeve të caktuara. Prandaj, krejt kjo fushatë, më tepër ka karakter politik sesa ligjor. Sa herë që nga politika përmenden hetimet për atë periudhë, kjo bëhet me qëllim të diskreditimit të një partie, apo politike sesa që ka interesim, apo tendencë që të niset një proces i mirëfilltë për të bërë kontrolle mbi fondet, pas 20 viteve”, thotë Lepaja për tesheshi.com.
Kujtojmë se pas përfundimit të luftës, Isa Mustafa që në atë kohë ka shërbyer si ministër i Financave, ka thënë se nga fond i “3 përqindëshit” kanë mbetur pa shpenzuar rreth 50 milion marka. Ndërkohë, asnjëherë nuk janë prezantuar të dhëna sa para kanë mbetur pa u shpenzuar nga fondi tjetër “Vendlindja Thërret”. /tesheshi.com/
