Autoritetet në Gjermani janë alarmuar nga incidentet në rritje në strehat e pritjes së refugjatëve, ndërsa vendi përballet me një fluks të pandalshëm azilkërkuesish. Incidenti më i fundit i dhunshëm ndodhi në Heidenau në afërsi të Dresdenit, ku pas dy ditësh protesta mbetën të plagosur me dhjetëra policë.
Zëvendës kancelari gjerman Sigmar Gabriel pritet të vizitojë këtë qendër të hapur afër Dresdenit, në një përpjekje për të qetësuar situatën.
Ndërkohë në Saxony, mbrëmjen e së dielës aktivistët e majtë u përleshën me ata ta krahut të djathtë.
Gjermania pret këtë vit mbi 800 mijë aplikime për azil.
Sipas numrit dy të qeverisë gjermane, Gabriel, ekstremistëve të krahut të djathtë nuk u duhet lejuar asnjë milimetër hapësirë. Ai vlerësoi përpjekjet e kryebashkiakut të qytetit për kurajon kundër dhunës.
Media gjermane, raportoi se në zonën e Dresdenit është ngritur një zonë kontrolli nga policia, menjëherë pas dhunës mes grupeve të majta dhe të djathta.
Ministri i Brendshëm, Thomas de Maiziere premtoi të përdorë forcën e plotë të ligjit kundër atyre që ndërmarrin dhunë ndaj refugjatëve. /tesheshi.com/
