Lulzim Basha ka kërcënuar sot se “ushtria e Republikës së re do të marshojë në Kavajë dhe do ta rrëzojë republikën e vjetër”.
Ndërsa Andi Bushati, një përkrahës i afërt i Bashës, duke folur në emisionin e Ylli Rakipit e tha dhe më shkoqur: “Në Kavajë duhet të ketë dhunë pasi bandidët e Elvis Roshit largohen vetëm me banditët e Sali Berishës”.
Kjo është atmosfera e një situate që parashikon apokalipsin, ndërkohë që shumë analistë në vend po e krahasojnë Shqipërinë me një skenar maqedonas.
Dhe si për ta konfonduar, Sali Berisha nisi të nxjerrë përgjime shërbimesh sekrete, për të përdorur elementë që Zoran Zaev determinoi vitin 2015 me “bombat” e tij.
Por në fakt, ajo që që po profilohet si në Kavajë por edhe më 18 shtator nuk është gjë tjetër veçse skenari malazez përpara zgjedhjeve parlamentare të 21 tetorit 2016.
Ndodhi pikërisht që ditën e zgjedhjeve, ky skenar u ndalua dhe doli para publikut si një plan perfekt i organizuar në Moskë.
U arrestua grupi që parashikonte trazira në ditën e zgjjedhjeve, madje u fol edhe për atentat ndaj kryeministrit të asaj kohe, Milo Gjukanoviç.
Po ta krahasosh sfondin politik në Shqipëri me atë malazez ka analogji të skajshme.
Skena politik atje ishte e ndarë: njëra ishte me SHBA-BE dhe tjetra që sulmonte perëndimin; njëra me NATO-n e tjetra me Moskën.
Skena politike e ndarë thuajse me thikë: në njërën anë ishte partia Demokratike Socialiste e Milo Gjukanoviçit së bashku me aleatët e tij, pakicat kombëtare, dhe në anën tjetër një koalicion i madh partish pro serbe e pro ruse që dominonin opozitën.
Po tek ne?
Në një anë është PS, LSI PDIU, FRD dhe partitë e vogla aleate, por edhe partitë kundërshtare opozitare Libra dhe Sfida për Shqipërinë që do të hyjnë në zgjedjet e 18 qershorit; në anën tjetër është PD-ja me aleatët e saj PDK, PR, PAA dhe AK-ja e Kreshnik Spahiut që sipas të gjitha gjasave nuk do të marrin pjesë në zgjedhje.
Sipas diskursit politik të Lulzim Bashës jo se do të ketë një bojkot klasik, pra ata nuk do të shkojnë në votime dhe si të tilla kanë shpallur një sfidë të hapur politike me mazhorancën që do të vihet re në votime. Nëse më 18 qershor dalin më pak se 50% e shqiptarëve me të drejtë zgjedhjesh, atëherë edhe pse Edi Rama mund të qeverisë, nuk do ta ketë forcën morale dhe politike për të drejtuar gjysmën e pjesës që nuk ka votuar.
Por Basha thotë: “nuk do të ketë zgjedhje”!
Si nuk do të ketë zgjedhje? Ç’do të ndodhë? Si do të pengohen njerëzit apo procesi?
Ky është fjalëkryq i madh, pasi në një anë Basha thekson se nuk do të ketë dhunë, nga ana tjetër përdoret një diskurs i qartë që paralajmëron përplasje.
Identike ndodhi edhe në Mal të Zi, kur gjithçka u mbyll me arrestimin e grupit të njerëzve të armatosur që kishin përgatitur trazirat.
Më pas Gjukanoviç arriti shumicën parlamentare vetëm për një votë, ku deputeti shqiptar Genci Nimanbegu ishte i domosdoshëm.
Opozita shpalli bojkotin dhe sot e kësaj dite ajo nuk është në parlament.
OSBE dhe SHBA-BE njohën zgjedhjet e vendi po shkon drejt anëtarësimit në NATO.
Mali i Zi po stabilizohet ditë pas dite…
/tesheshi.com/
