Nga Mensur Krasniqi
Kuvendi i Republikës së Maqedonisë thuajse një muaj rezulton i bllokuar. Zhbllokimi i saj mbetet peng i obstruksioneve të ndryshme të cilat po i bën opozita maqedonase(VMRO-DPMNE) për shkarkim të Kryeprokurorit Publik, të cilin e kishin emëruar gjatë qeverisjes së tyre, Marko Zvërlevskin.
Pas kërkesave të shumta për fjalime procedurale të deputetëve të VMRO-së në mënyrë që ta bllokojnë zhvillimin normal të seancave parlamentare, sot njëri nga deputetët e kësaj partie, Ilija Dimovski i kërkoi kryetarit të Kuvendit, Talat Xhaferit që ta ndërpresin debatin për shkarkim të Zvërlevskit deri pas zgjedhjeve lokale pasi me ligj emërimet dhe shkarkimet janë të ndaluara gjatë kësaj periudhe.
VMRO DPMNE propozoi që ndryshimet kadrovike të lihen pezull deri pas zgjedhjeve, përfshirë edhe shkarkimin e Zvrlevskit pasi ligji thotë se gjatë kësaj periudhë duhet të lihen edhe debatet por edhe votimet.
Talat Xhaferi tha se ligji nuk e ndalon që ata të vazhdojnë me debatin pasi janë institucioni ligjvënës. S’ka pengesa për të vazhduar me punën dhe kanë të drejtë të thirrin seanca.
Nga ana tjetër, deputeti Antonio Milloshovski, sërish nga VMRO ia kujtoi Xhaferit se gjatë Qeverisë teknike ku ka patur përfaqësues edhe nga partia e tij, Drejtorisë për Antikorrupsion i kanë kërkuar mendim nëse mund të shkarkojnë dhe emërojnë funksionarë shtetëror dhe kjo drejtori ka thënë se ata nuk kanë të drejtë derisa të mbarojnë zgjedhjet. “Nëse ligji vlen për Qeverinë, vlen edhe për Kuvendin”, tha Milloshovski.
Sipas profesorit universitar, Mitasin Beqiri, kryetari Kuvendit në asnjë mënyrë nuk duhet pranojë propozimin e VMRO-së për shkarkimin e Zvërlevskit para zgjedhjeve lokale, meqenëse këtë nuk mund ta ndalojë ligji. Ligji në të cilin referohen deputetët e VMRO-së, sipas Beqirit vlen vetëm për emërime dhe shkarkime të drejtorive të ndryshme dhe jo për një institucion të pavarur siç është Prokuroria.
“Pavarësisht se deputetët e VMRO-së kërkojnë shtyerjen e mbledhjes për shkarkimin e kryeprokurorit. Ata do mundohen të bëjnë edhe obstrukcione tjera për t’ia zgjatur dhe neglizhuar punën në Kuvend, mirëpo debati për shkarkimin e kryeprokurorit duhet vazhduar dhe nuk duhet ndërprerë. Ligjin në të cilin referohen deputetët e VMRO-së për ta ndërprerë debatin për shkarkimin e prokurorit pasi që janë caktuar zgjedhjet lokale nuk vlen për shkarkimin e Zvërlevskit, por vetëm për drejtorët dhe funksionerët e drejtorive të ndryshme. Me vet aktin e propozimit për shkarkim kryeprokurori, tashmë është dashur të ofrojë dorëheqje. Ky kryeprokuror i propozuar nga ish pozita parlamenatre sipas mendimit tim u tregua i pa aftë në ushtrimin e detyrës së tij. Si rezultat i jo transparencës, dhe jo objektivitetit të tij, u formua edhe prokuroria speciale”, deklaroi për tesheshi, profesori Mitasin Beqiri.
Ndërsa sipas analistit politik, Mersel Bilalli, shumica parlamentare duhet propozuar ndryshimin e rregullores së Kuvendit, ku VMRO-së do ti ishte pamundësuar shfrytëzimi i panevojshëm i fjalimeve procedurale për qëllime të liga, siç është rasti me shkarkimin e Zvërlevskit. Nëse vazhdohet me fjalime procedurale, për çdo pikë të rendit të ditës mund të rrezikohet bllokimi i Kuvendit.
“Ata(VMRO) prokurorin publik e kanë kashtën e fundit që shpreson kreu i krimit të organizuar dhe kompanjonët e tij. Kjo tregon se krimi i organizuar i pushtetit ka funksionuar si piramidal. Ata deputët që tani luftojnë me energjitë e fundit në masë të madhe, kanë qenë të përfshirë në shtresa të caktuara të piramidës kriminale. Mendoj se pjesa e shumicës parlamentare urgjent duhet ta ndryshoj rregulloren e kuvendit, që të kufizoj kohëzgjatjen ditore të një pike të rendit të ditës. Kështu do të mbërrijmë gjer në absurd”, deklaroi për tesheshi, analisti politik, Mersel Bilalli.
Sa i përket asaj se tani janë shpallur zgjedhjet, sipas Bilallit, kjo nuk ka të bëjë me funksionet e zgjedhura nga parlamenti dhe qeveria, por vetëm me projektet, subvencionet, punësimete dhe të ngjashme.
Ndryshe, kujtojmë se prokurori Zvërlevski ishte emëruar nga qeveria e VMRO-DPMNE-së, dhe i njëjti nga bisedat e përgjuara të opozitës dyshohet se ka ndihmuar krimin e organizuar. /tesheshi.com/
