Kryeministri Kurti dhe kryeministrja serbe Ana Bërnabiç patën një përplasje në Samitin e investimeve në Ballkanin Perëndimor, të organizuar nga BERZH-i në Londër.
Aty ku po marrin pjesë gjashtë liderët e vendeve të Ballkanit Perëndimor, përplasja lindi kur Bërnabiç tha se Kosovën e shohin “si pjesë të Serbisë”. Kurti më pas iu përgjigj se vendi i tij quhet Republika e Kosovës dhe se njihet anë e mbarë botës si shtet,
“Serbia po ndryshon. Dhe kur them Serbia qendrore, është e dyta herë që po e them këtë, mendoj Serbia që nuk përfshin në statistika krahinën autonome të Kosovës e Metohisë, që ne natyrisht e shohim si pjesë të Serbisë. Kjo është politikë, ne tash po flasim për ekonomi dhe është me rëndësi për mua të flas vetëm për ekonominë”, tha kryeministrja serbe.
Pas saj foli Kurti, i cili u pyet paraprakisht nga dikush se si arrin Kosova të tregtojë me vendet mosnjohëse.
“Pikë së pari, partneri ynë kyç është bashkësia europiane dhe dëshirojmë që ta fuqizojmë këtë bashkëpunim. Kosova është njohur nga 117 vende anë e mbanë botës, 22 nga 27 në Europë, 26 nga 30 në NATO dhe 3 nga 4 vendet fqinje. Nuk kemi lidhje me Federatën Ruse.
Iu kemi vënë sanksione atyre dhe duam që Ukraina ta fitojë këtë luftë. Na duhet bota dhe Europa demokratike që ta shohim të mposhtur Kremlinin dhe kryetarin despotik, Putinin. Edhe nëse ata do të donin, ne nuk do të donim të kishim punë me ta. Kemi pak import me Kinën, por bashkëpunojmë kryesisht me BE-në”, tha Kurti.
Gjatë argumentimit të tij, Kurti u shpreh se nëse do të vepronte njësoj si Bërnabiç, atëherë do të fliste për Vojvodinën, Sanxhakun apo Luginën e Preshevës që janë territore të banuara nga shqiptarë por që janë brenda territorit të shtetit të Serbisë.
“Vendi im quhet Republika e Kosovës, jo siç iu referua këtu, ‘Kosova e Metohija’. Po të shkoja kësaj rruge do të merrja shumë kohë, sepse përveçse Serbia, do të duhej të thosha Serbia e Vojvodina, Sanxhaku, Toplica, Rashka, Lugina e Preshevës… Më mirë të përqendrohemi në ekonomi”, tha Kurti. /tesheshi.com/
