Tensione dhe debate ka pasur në mbledhjen e grupeve parlamentare të PD-së dhe LSI-së ku është diskutuar mbi aksionin për Kryeprokurorin e përkohshëm.
Siç mësohet, ka qenë Monika Kryemadhi, kryetarja e LSI-së që ka akuzuar PD-në si “anemike” në aksionin e sotëm në sheshin para Parlamentin, që sipas saj kanë lënë të vetëm deputetët e LSI-së dhe militantët e saj për të çarë kordonin policor.
Kryemadhi ka thënë që sot opozita nuk duhet të kishte lënë të vijonte procedura normale e votimit të Kryeprokurorit. Kreu i LSI-së është angazhuar personalisht që të pengonte seancën, ku ka tentuar madje qw tw ndalojw dhe Ulsi Manjën që të votonte, si dhe ka qëlluar drejt podiumit të qeverisë me këpucë, letra apo edhe me objekte të tjera.
Por moskoordinimi në pjesën e dytë të seancës të deputetëve të PD-së, ka shqetësuar kreun e LSI-së e cila në mbledhjen e zhvilluar në selinë blu, ka folur për “shans të humbur”.
“Mund të mos e linim Ramën që të shkonte me Artën në Bruksel. Ai ishte i terrorizuar. Por dikush nga ne u frikësua. Dhe e them me bindje se ai dikush nuk ishte nga LSI-ja”, ka thënë Kryemadhi.
Lulzim Basha nga ana e tij e ka cilësuar protestën për Kryeprokurorin si një nisje parimore dhe jo një qëllim për të krijuar incidente.
“Ne sot kemi hapur një rrugë të drejtë dhe parimore, ku siç bëmë me dekriminalizimin të ecim drejt dhe me durim drejt një konsensusi ndërkombëtar, i cili nëse vazhdojmë kështu do të vijë menjëherë. Unë e them këtë edhe pas takimeve që ka pasur në Londër me drejtues të rëndësishëm të PPE-së, por edhe nga telefonatat me personalitete të rëndësishme ndërkombëtare”, tha Basha.
Një nga telefonatat ndërkombëtare bënë që PD të mos çante kordonin e policisë dhe të hynte me dhunë në Kuvend. /tesheshi.com/
