Beteja verbale mes dy shteteve pas ekzekutimit të 47 personave në Arabinë Saudite, mes të cilëve një klerik shiit, dhe zjarri i vënë në orët e para të së dielës në ambasadën e Arabisë Saudite në Teheran, kanë çuar në një vendim drastik të sauditëve: ndërprerjen e marrëdhënieve diplomatike me Iranin.
Lajmin e ka bërë të ditur ministri i Jashtëm saudit, Adil el-Xhubejri, që në një konferencë për shtyp ka deklaruar se misionit diplomatik iranian dhe gjithçkaje që ka të bëjë me të i është dhënë 48 orë kohë për t’u larguar nga Arabia Saudite.
“Riadi nuk do ta lejojë Teheranin të minojë sigurinë e mbretërisë,” tha ai.
Njëkohësisht, ministri i Jashtëm njoftoi se të gjithë diplomatët sauditë, së bashku me personelin bashkëshoqërues, e kishin lënë Iranin dhe gjendeshin në Emiratet e Bashkuara Arabe, në rrugën drejt vendit të tyre.
El-Xhubejri e quajti Iranin një kërcënim rajonal për kontrabandimin e armëve dhe lëndëve shpërthyese dhe për strehimin e mëhershëm të militantëve të El-Kaedës.
Duke iu përgjigjur një pyetjeje nga një gazetar, shefi i politikës së jashtme saudite tha se qeveria iraniane ishte e përfshirë në sulmet në ambasadën e Arabisë Saudite, e se forcat iraniane të sigurisë nuk u përpoqën aspak t’i largonin protestuesit edhe pse gjendeshin në vendin e ngjarjes. /tesheshi.com/
