Nuk ka të ndalur dhuna e lidhur me futbollin, për t’u ardhur radha tani gazetarëve ta provojnë atë mbi kurrizin e tyre.
Eduard Ilnica, gazetari i njohur sportiv, është goditur egërsisht nga presidenti i klubit të futbollit “Kastrioti” në zonën e Zogut të Zi në Tiranë.
Ilnica është shtruar në Spitalin e Traumës, me hematoma të rënda. Pamja e tij nuk lë vend për dyshime mbi intensitetin e dhunimit.
Ndërkaq, policia e Tiranës ka arrestuar Alban Voglin, presidentin e Kastriotit, që akuzohet nga Ilnica se e ka sulmuar.
Ngjarja ka ndodhur ndërkohë që gazetari sportiv po hipte në automjetin e tij. Në atë çast është sulmuar nga disa persona, që e kanë goditur me mjete të forta.
Eduard Ilnica i ka deklaruar policisë se një nga dhunuesit ishte presidenti i Kastriotit, i cili ka tentuar ta fusë në makinën e tij.
Materialet hetimore i kanë kaluar prokurorisë, me akuzat për “heqje të lirisë” dhe për “ushtrim dhune për shkak të detyrës”. Ngjarja ka ndodhur rreth orës 23:00 të së hënës, te Zogu i Zi. /tesheshi.com/
