Përplasja në Elbasan, 9 akuzat e biznesmenit kundër policisë

Biznesmeni Petrit Çela, pronari i tregut agro-ushqimor në Elbasan, ku ndodhi incidenti mbrëmjen e 18 shtatorit, ka kallëzuar në Prokurorinë e Krimeve të Rënda 7 oficerë të Policisë.

Nëpërmjet avokatit, Çela denoncon zv.drejtorin e Policisë së Elbasanit dhe 6 efektivë që ndodheshin me të natën e ngjarjes, për 9 vepra penale, që nga “shpërdorimi i detyrës”, deri te “kallëzimi i rremë”.

Në kallëzim, biznesmeni pretendon se deklarimet e policëve që kanë qenë në aksion janë të ndryshme nga ajo çfarë ka ndodhur në realitet. Avokati i Çelës u shpreh dje se ndaj djalit të biznesmenit, shtetasit Suel Çela, nuk ka asnjë urdhër ndalimi nga ana e Prokurorisë për Krime të Rënda.

“Me sa dimë ne dhe me aq sa na ka shpjeguar prokuroria, nuk është shpallur në kërkim”, u shpreh dje avokati. Sipas kallëzimit që është depozituar dje në Prokurorinë e Krimeve të Rënda, pretendohet se nga Policia janë shtrembëruar faktet dhe dinamika e ngjarjes, pasi sipas biznesmenit, nga filmimet e kamerave të sigurisë rezulton se veprimet e Policisë janë të kundërta nga ato që kanë deklaruar kur janë marrë në pyetje, shkruan Panorama.

Kallëzimi

Nëpërmjet kallëzimit të biznesmenit Petrit Çela kërkohet ndjekja penale për 9 akuza e 7 oficerëve të Policisë së Elbasanit, përfshirë edhe zv.drejtorin.

“Më datë 18 shtator 2017, në orën 20:00, nga punonjësit e Drejtorisë Vendore të Policisë Elbasan është bërë ndalimi i një automjeti në pronësinë time përpara ambienteve të tregut, i cili në atë orë është i mbyllur.

Sipas të dhënave të përhapura nga organet e Policisë, mjeti është ndaluar për verifikim dhe janë shoqëruar dy personat që ndodheshin në mjet për verifikim në drejtori, të cilëve nuk u është gjetur në posedim në mjet apo me vete, asnjë send i jashtëligjshëm dhe as kanë kryer ndonjë veprim të kundërligjshëm”, thuhet në kallëzimin e Çelës.

Ndërsa sqaron se shkaku i këtij kallëzimi ka të bëjë me faktin se nga momenti i ndalimit të mjetit e në vijim të asaj dite, në të gjitha publikimet e informacionet e dhëna nëpër media, është paraqitur sikur ai e familjarë të tij janë persona të rrezikshëm, me të dhë- na kriminale, duke krijuar një situatë krejt të panatyrshme e të paqenë. Për më tepër, sipas Çelës, në të gjitha deklarimet e bëra nga këta persona përpara OPGJ për përshkrimin e ngjarjeve e fakteve të ndodhura atë ditë përpara ambienteve të tregut, janë të ndryshme nga faktet e realitetit.

Pretendimet

Sipas Petrit Çelës, veprimet e deklarimet e rreme për ngjarjen e veprimet e kryera nga punonjësit e Policisë natën e incidentit, janë shoqëruar edhe me kryerje të kontrolleve të paligjshme në banesa, si dhe me paraqitjen e informacioneve të rreme përpara organit të akuzës.

“Në informacionin e përcjellë për regjistrimin e procedimit penal nr.289 të vitit 2017 nga Prokuroria, në bazë të informacioneve e materialeve të përcjella e të përpiluara nga dhe në bazë të të dhënave të të kallëzuarve, është bërë regjistrimi i procedimit penal, duke u ndaluar edhe tre persona në kuadër të këtij procedimi, mbi këto të dhëna të krijuara nga këta persona.

Theksoj se, në bazë të të dhënave të pasqyruara në regjistrimet e kamerave të sigurisë, rezulton krejt e kundërta e atyre çfarë kanë deklaruar e paraqitur si rrethana të ngjarjes të akuzuarit”, pretendon në kallëzimin e tij biznesmeni Petrit Çela.

Akuzat