Më shumë se 40 vjet pas rrëzimit misterioz të një avioni italian pasagjerësh ku humbën jetën 81 persona, çështja po bëhet sërish tituj mediash në fqinjit tej Adriatikut.
Ish-kryeministri italian Giuliano Amato fajësoi Francën për aksidentin në edicionin e së shtunës të gazetës La Repubblica dhe kërkoi që të ketë një kërkimfalje nga francezët. Amato tha se avioni u godit nga një raketë franceze.
Plani aktual ishte vrasja e liderit të atëhershëm libian Muammar Gaddafi, i cili ishte në një avion luftarak.
Avioni i kompanisë Itavia ra në Detin Mesdhe pranë ishullit italian Ustica më 27 qershor 1980. Asnjë nga 81 pasagjerët në bordin e DC9 nuk mbijetoi. Deri më sot, mbetet e paqartë se çfarë ka ndodhur në të vërtetë.
Së bashku me teorinë e përplasjes aksidentale, pati edhe spekulime për një përleshje mes avionëve të Forcave Ajrore Libiane dhe avionëve të NATO-s.
Tashmë ka pasur disa çështje gjyqësore lidhur me ngjarjen, por asnjë prej tyre nuk ka sqaruar asgjë.
Amato, tani 85 vjeç, ishte përfshirë në këtë çështje në mesin e viteve 1980 përpara se të bëhej kryeministër, duke shërbyer fillimisht nga viti 1992 në 1993 dhe më pas nga 2000 në 2001.
Në një intervistë për Repubblica, politikani, i cili tani nuk është anëtar i asnjë partie, tha se “mundësia më e mundshme” është që avioni i pasagjerëve të jetë rrëzuar aksidentalisht nga një avion luftarak francez. Amato i bëri thirrje presidentit Emmanuel Macron që të kërkojë falje në emër të Francës.
“Heshtja e vazhdueshme nuk më duket zgjidhje”, tha ai.
Qeveria aktuale e djathtë italiane i ndoqi me interes këto deklarata. Kryeministrja Georgia Meloni foli për “deklarata të rëndësishme që meritojnë vëmendje”. Njëkohësisht ajo tha se këto janë konkluzionet personale të Amato-s dhe jo qëndrimi i qeverisë së saj. Zëvendësi i saj Matteo Salvini i telefonoi Parisit për të reaguar. /tesheshi.com/
