Policia e Shtetit ofroi një bilanc nga dita e djeshme, ku efektivë të saj u ballafaquan me reagime nga dhjetra individë që kundërshtonin prishjen e godinës së vjetër të TK-së.
Në fillim të deklaratës informuese, ajo i mëshon faktit se është goditur e lënduar nga protestues.
“Disa persona nga radhët e tubuesve kanë qëlluar herë pas herë në drejtim të forcave të Policisë, me sende të forta dhe shkopinj, duke lënduar 7 punonjës policie në detyrë. Punonjësit e lënduar janë efektivë të Patrullave të Përgjithshme dhe të forcës së posaçme ‘Shqiponja’. Ata kanë marrë ndihmën e parë në spitalin e Traumës dhe spitalin ‘Nënë Tereza’ dhe janë jashtë rrezikut për jetën”, thuhet në deklaratë.
Policia bën me dije se ka arrestuar 7 persona, në krye të të cilëve është dhe kreu i Vetëvendosjes në Tiranë, Bojken Abazi.
” Në përfundim të veprimeve të kryera, specialistët për Hetimin e Krimit në Komisariatet e Policisë Nr. 1 dhe Nr. 3, arrestuan në flagrancë për veprat penale ‘Kundërshtim me dhunë i punonjësit të policisë së rendit publik’ dhe ‘Pjesëmarrja në grumbullime të paligjshme’, 7 shtetas:
B. A., 38 vjeç;
K. Q., 37 vjeç;
S. N., 35 vjeç;
R. L., 35 vjeç;
E. M., 33 vjeç,
B. T., 30 vjeç;
E. Xh., 33 vjeç.
(Bolken Abazi, Kasteriot Qemaj, Sokol Ndoj, Romeo Lila, Endrit Mertiri, Burim Tafilica dhe Edjon Xhoxhaj).
U proceduan në gjendje të lirë për veprën penale ‘Pjesëmarrja në grumbullime të paligjshme’, 21 shtetas.
Për 36 persona të tjerë që ishin të shoqëruar në ambientet e Komisariateve u mor masë administrative në zbatim të Aktit Normativ për marrjen e masave të veçanta kufizuese, me qëllim parandalimin e përhapjes së COVID-19.
Policia e Shtetit apelon për organizatorët dhe pjesëmarrësit në tubim, se grumbullime të tilla janë në kundërshtim të plotë me ligjin dhe Aktin normativ duke u shndërruar në një rrezik potencial për përhapjen e infeksionit COIVD-19, pasi Tirana është ende një zonë e kuqe në hartën epidemiologjike të vendit”, përfundon deklarata.
