Përplasja e radhës Rama-Meta ka patur në fokus financimin e aksit Vlorë – Radhimë – Orikum. Ky segment, me financim nga Fondi Saudit, sipas Ramës është bllokuar nga Meta. Shefi i qeverisë e tha këtë paraditë gjatë një inspektimi të disa veprave publike në Vlorë.
Siç tha Rama, ai s’e kuptonte, por dhe e kuptonte, arsyen e bllokimit, por që po bënte durim.
Presidenca, pra Meta, me atë zëdhënësit Blushi iu përgjigj se “të gjitha procedurat për realizimin e këtij projekti, përfshirë dhe ato të marrjes së huasë, janë kryer në shkelje të rëndë të Kushtetuës, ligjit nr. 43/2016, dhe ligjit nr. 9665/2006. Për të riparuar këtë të metë të rëndë të praktikës së ndjekur, është e detyrueshme ashtu siç e kemi cituar prej kohësh, që Ministria e Financave dhe Ekonomisë, së pari duhet të pajiset me një autorizim për të zhvilluar një proces kushtetues negocimi me fondin Saudit i Zhvillimit, e më pas në përfundim të rezultatit të negocimit dhe pas miratimit nga Këshilli i Ministrave të kërkojë autorizimin e Presidentit të Republikës, për nënshkrimin e marrëveshjes së huasë. Presidenti i Republikës mbetet në pritje që Këshilli i Ministrave dhe Ministria e Financave dhe Ekonomisë të përmbushin detyrimet kushtetuese dhe ligjore për lidhjen e kësaj marrëveshjeje”.
Më tej thuhet se “Presidenti Meta, garanton qytetarët e Qarkut të Vlorës dhe të gjithë Shqipërisë se është i vendosur të mbrojë interesin publik dhe njëkohësisht do të respektojë kërkesat e tyre për investime publike, pa i lënë shteg Kryeministrit ende në detyrë, që të shpërdorojë fondet shtetërore për qëllime selektive elektorale”.
Reagoi Rama, duke shkruar: “Ilir Meta thotë se realizimi i një projekti të hartuar prej kohësh për infrastrukturën turistike të Vlorës qenka ‘qëllim selektiv elektoral’, prandaj ai e mbaka bllokuar prej muajsh autorizimin formal për marrjen e financimit të siguruar nga Fondi Saudit! Të qash e të qeshësh!
Projekti gati, financimi gati, por ndërhyrja transformuese përgjatë segmentit Vlorë-Orikum dhe banorët, sipërmarrësit, turistët e asaj zone duhet të presin Ilir Metën!
Kam pritur me durim e do presim edhe pak që IM të lexojë sqarimet që i kemi nisur, para se të flasim me Vlorën!”.
Më pas, mbërriti dhe sqarimi që Meta kërkonte nga Ministria e Ekonomisë. /tesheshi.com/
