Ditën e djeshme një pjesë e deputetëve në 8 qarqe të ndryshme të vendit dolën para mediave për të shpallur kandidaturat për kryetarë bashkish që u vendosën pas takimit me kreun e PS-së, Edi Rama. Por në këtë dalje mungonin një pjesë e mirë deputetësh, të cilët nuk kanë qenë dakord me këto kandidatura. Përveç Ben Blushit, i cili e ka bërë të ditur qëdrimin e tij kritik kundër procesit të përzgjedhjeve të kandidaturave, në këtë dalje kanë munguar edhe deputetë të tjerë, të cilët kanë kundërshtuar dhe debatuar me Ramën në lidhje me marrëveshjen që ka lidhur me aleatët pa marrë pëlqimin e bazës.
Kështu, deputeti socialist, Alfred Peza, i cili është një nga fituesit realë të 23 qershorit 2013, pasi përmbysi situatën në rrethin e Peqinit, pas një humbje në dy mandate parlamentare dhe 2 vendore, nuk ishte prezent dje në shpalljen e kandidaturave. Siç mësohet nga burime brenda mazhorancës, Peza, ka kundërshtuar dhënien e bashkisë së Peqinit një përfaqësuesi të PDIU. Kjo ka ndodhur për disa arsye: Alfred Peza, një gazetar i njohur, para se të hynte në politikë, arriti të mundi dy personazhe të fuqishëm të mazhorancës në zgjedhjet e 2013, Dashnor Sulën, deputet i PD dhe Aqif Rakipin e PDIU që kërkonin të nxirrnin PS në margjina.
Fushata e polarizuar pati incidente ku Peza u qëllua me armë gjatë fushatës, incident për të cilin Peza akuzoi kandidatin e PDIU sot deputet; Aqif Rakipin, i njohur si një “tomdosh” tjetër në Parlament. Rakipi do të vendosë kreun e bashkisë së Peqinit, në aleancë tashmë me PS.
Por gjërat pritet të komplikohen, sepse kush do të ketë bashkinë do të arrijë të sigurojë edhe mandatin për deputet, pasi bashkia përbën një zonë të plotë elektorale parlamentare.
Ndërkaq përveç këtij rasti, mësohet se ka pasur përplasje edhe nga PS e Rrogozhinës, një bastion i gjithkahershëm i të majtëve, që sërish i është dhënë PDIU. Një tjetër pakënaqësi me ndarjen e “tortës” ka ndodhur edhe me bashkinë e Bulqizës, e cila iu dha LSI-së, ndërkohë që PS sapo e ka marrë, pikërisht një javë pas zgjedhjeve të 23 qershorit 2013. Kryetari i kësaj bashkie, Myfit Duriçi e fitoi bindshëm atë, por nuk e gëzoi, pasi pritet që Lëvizja Socialiste për Integrim të vendosë kandidaturën e saj, që ende nuk është miratuar.
/tesheshi.com/
