Kadri Veseli dhe Jakup Krasniqi, i pari kryetar aktual i Kuvendit të Kosovës dhe i dyti ish- kryekuvendar, dikur kolegë partiakë në PDK, sot rivalë politik, jo rrallëherë përplasen mes tyre për tema të ndryshme.
Përplasja më e fundit në distancë mes tyre ka pasur të bëjë me një deklaratë të Veselit i cili foli në lidhje me largimin e banorëve nga banesat e uzurpuara në lagjen “Dardania” në Prishtinë, ku ditë më parë ndodhën edhe përplasje mes policisë dhe banorëve që jetojnë për 17 vjet në banesat në fjalë, të cilat i kishin pushtuar pas përfundimit të luftës.
Veseli duke folur për largimin e familjeve nga banesat, theksoi se nuk do të mbetet asnjë uzurpator në vend, por shtoi se asnjë forcë e as forca e pushtetit nuk është mirë të abuzojë me familjarët dhe me njerëz hallexhinj.
Veseli shkoi aq larg saqë largimin e këtyre familjeve nga banesat që po bëhet me vendim gjykate, e ndërlidhi me largimin e familjeve dhe fëmijëve që bëhet ditët e sotme në Siri.
“Dikujt më duket po iu pëlqejnë shumë skenat e Sirisë dhe po thërret dhe për skena të luftës”, deklaroi Veseli.
Por, deklarata e Veselit, siç duket nuk i ka pëlqyer Jakup Krasniqit, i cili i është kundërpërgjigjur ish-bashkëpartiakut të tij, duke i thënë se Kosova nuk është Siri dhe se për këtë është i bindur që Veseli nuk ka asnjë argument që do ta vërtetonte.
Ish-parlamentari thotë se të qënët në krye të institucioneve të larta të shtetit përveç që është një lloj privilegji, është shumë më shumë – përgjegjësi, jo vetëm për familjen e partinë, por për afër dy milionë qytetarët e Kosovës.
“Nga Kosova kanë ikur shumë njerëz, ata ikin përditë për shkak se këtu nuk e shohin perspektiven e tyre për punë e siguri, por Kosova sot nuk është Siri. Në vitet e luftës çlirimtare ishte Siri, por atë e bëri Serbia, politika e saj e gjenocidit, politikë që e donte Kosovën pa shqiptarë. Prandaj ia vuri zjarrin çdo gjëje. Ashtu siç ia vunë zjarrin Sirisë, Asadi e ISIS-i”, thuhet në reagimin e Krasniqit.
Ish-kryekuvendari thotë se institucionet dhe drejtuesit e shtetit, për shkak të informacioneve që kanë, janë të parët që duhet të ndalojnë çdo aktivitet, të kujtdo qoftë, që ta pengojnë e parandalojnë çdo përpjekje për ta bërë Kosovën Siri.
“Kryetari i Kuvendit dhe Kryeministri dhe çdo institucion tjetër i sigurisë kombëtare, janë të obliguar që t’i marrin masat parandaluese kundër secilit që i ‘pëlqejnë skenat e Sirisë’. Nëse është thënë sa për të thënë, është gabim i madh. Vërtetë, kujt po i ‘pëlqejnë skenat e Sirisë’?! Nuk e di kujt i drejtohet kjo, por pse nuk është vendi të thuhet e nuk ka asnjë argument, jam më se i bindur.
Mos e ndjellni Sirinë, për të cilën gjendje atje, fajin e ka Asadi!Qytetarëve që kanë vendimet e gjyqit për t’i liruar banesat nuk besoj që iu ‘pëlqejnë skenat e Sirisë’?!”, thuhet në reagimin e Krasniqit.
Blendi Gashi – /tesheshi.com/
