Liderët politikë të luginës së Preshevës pritet të kenë takime në Amerikë dhe në Bashkimin Europian në përpjekjen e tyre për njohjen e asocacionit të komunave shqiptare në Serbi, miratuar më 12 Shtator nga këshilltarët komunalë të tre komunave.
Kryetari i Këshillit Nacional të Shqiptarëve në Luginë, Jonuz Musliu kërkoi mospërdorimin e standardeve të dyfishta nga BE, pasi ky i fundit dha sinjale jo pozitive për asocacionin.
“Mendoj se vlerësimi i Bashkimit Evropian nuk është i drejtë. Por, këta të fundit nuk mund të punojnë me dy standarde, ndryshe me serbët në Kosovë e ndryshe me shqiptarët në Luginë të Preshevës. Problemet duhet t’i zgjidhin në mënyrë proporcionale”, ka thënë Musliu në një intervistë për median lokale.
Javët e ardhshme, sipas tij, ai dhe delegacioni nga Lugina do të kenë takime me zyrtarë të lartë të SHBA-së dhe të BE-së.
“Më 7,8 dhe 9 tetor ne do të udhëtojmë për në Shtetet e Bashkuara të Amerikës dhe do të kemi takime të ndryshme me senatorë dhe përfaqësues të lobit shqiptar atje. Pra, kjo është njëra prej mbështetjeve të para. Gjithashtu, më 30 Shtator, do të zhvilloj takime në Bruksel me përfaqësues për të drejtat e njeriut”, tha ai.
Deklarata për AKSHL-së u miratua më 12 shtator në mënyrë unanime me votat e 43 këshilltarëve komunalë. /tesheshi.com/
