Prokuroria Publike e Maqedonisë ka ngritur akuza kundër 29 personave për pjesëmarrje në ngjarjet e Kumanovës më 9 dhe 10 maj. Vendimi, thonë nga institucioni, është miratuar në bazë të dëshmive nga hetimi.
Në bazë të nenit 394-a të Kodit Penal, të pandehurit akuzohen për vepra penale, për organizim terrorist, e në bazë të nenit 394-b, akuzohen për terrorizëm. Prokurori i çështjes dorëzoi në të njëjtën kohë një propozim për vazhdimin e masës së paraburgimit për të akuzuarit, njoftojnë nga Prokuroria Publike e Republikës së Maqedonisë.
Ngritjen e akuzës, sipas televizionit Alsat, e konfirmoi Gjykata Themelore Shkup 1, prej nga sqaruan se akti tani do të shkojë në vlerësim.
“Aktakuza është caktuar për vendim në Këshill për vlerësim të aktakuzës.”
Sipas Prokurorisë Publike, 9 nga të akuzuarit janë shtetas të Maqedonisë, 18 nga Kosova, dhe dy kanë shtetësi të dyfishtë, të Kosovës dhe Shqipërisë, apo shtetësi kosovaro-gjermane. Për një person është në vijim procesi i ekstradimit nga Kosova.
Në aktakuzë deri më tani nuk janë përfshirë personat e aksioneve të fundit. Vijon hetimi edhe për dhjetë persona, pesë prej të cilëve janë në paraburgim, dy janë në arrest shtëpiak, dhe tre janë ende në kërkim.
Në luftimet në Lagjen e Trimave në Kumanovë mes forcave speciale policore dhe një grupi të armatosur, të prezantuar si “Ushtria Çlirimtare Kombëtare”, u vranë 18 persona, prej të cilëve 8 qenë policë, e 10 qenë anëtarë të grupit, ndërsa 29 të tjerë u arrestuan, shumica prej të cilëve shtetas të Kosovës. /tesheshi.com/
