Presidenti Trump i ka bërë thirrje shokut republikan Brad Raffensperger, sekretari i shtetit i Gjeorgia-s, për të “gjetur” votat e mjaftueshme me qëllim që të kthejë humbjen në fitore. Telefonata mes tyre u publikua ekskluzivisht nga Washington Post.
Regjistrimi tregon Trump-in së pari duke kundërshtuar Raffensperger-in, pastaj duke u përpjekur ta miklojë atë, duke e lutur atë për të vepruar dhe më pas duke kërcënuar me pasoja të paqarta.
Gjatë thirrjes, Raffensperger dhe këshilltari kryesor i zyrës së tij hodhën poshtë pretendimet e Trump-it, duke shpjeguar se presidenti mbështetej në teori konspirative dhe se fitorja e Joe Biden-it në Georgia me 11,779 vota ishte e drejtë dhe e saktë.
Por Trump hodhi poshtë argumentet e tyre.
“Njerëzit në Georgia janë të zemëruar…,” tha ai. “Dhe nuk ka asgjë të keqe të thuash, ti e di, uh, se ke llogaritur keq.”
Raffensperger u përgjigj, “Epo, Z. President, problemi që keni është se të dhënat tuaja janë të gabuara.”
Në një moment tjetër, Trump tha:
“E shikon. E tëra që dua është kjo. Unë thjesht dua të gjej 11,780 vota, që është një më shumë se sa kemi”.
“Biseda fatkeqe dhe nganjëherë jo koherente siguroi një pasqyrë të jashtëzakonshme se sa i dëshpëruar është Trump, veçanërisht në lidhje me humbjen, i gatshëm ose i paaftë për të hequr dorë nga çështja, duke besuar ende se ai mund t’i kthejë rezultatet në mjaft shtete në fushën e betejës për të qëndruar në detyrë”, shkruan WP.
“Nuk ka asnjë mënyrë që ta humbë Georgia-n”, tha Trump, një frazë që ai e përsëriste vazhdimisht gjatë thirrjes. “Në asnjë mënyrë. Ne fituam me qindra mijëra vota.”
Disa nga aleatët e tij ishin në kontakt ndërsa ai fliste, duke përfshirë shefin e kabinetit të Shtëpisë së Bardhë Mark Meadows dhe avokaten konservatore Cleta Mitchell.
Shtëpia e Bardhë, fushata e Trump dhe Meadows nuk iu përgjigjën menjëherë kërkesës për koment mbi audion e lëshuar.
Të dielën, Trump shkroi në Twitter se ai kishte folur me Raffensperger-in, duke thënë se sekretari i shtetit “nuk dëshiron ose nuk është në gjendje të përgjigjet për mashtrimin e fletëvotimeve nën tryezë: Ai nuk ka ide!”
Raffensperger gjithashtu u përgjigj në Twitter: “Sinqerisht, Presidentit Trump: Kjo që po thoni nuk është e vërtetë”.
Presioni që Trump i ka bërë Raffensperger-it është shembulli i fundit i përpjekjes së tij për të refuzuar rezultatin e zgjedhjeve.
Ai më parë kishte thirrur udhëheqësit republikanë nga Michigani në Shtëpinë e Bardhë, ku i bëri presion guvernatorit republikan Brian Kemp që të përpiqej të zëvendësonte të zgjedhurit e shtetit dhe i kërkoi Kryetarit të Dhomës së Përfaqësuesve të Pensilvanisë që të ndihmonte të kthente humbjen e tij në atë shtet.
Thirrja e tij për Raffensperger-in arriti kur një numër republikanësh u zotuan të sfidojnë votimin e Kolegjit Zgjedhor për Joe Biden të mërkurën. Republikanët nuk kanë vota për të penguar fitoren e Biden, por Trump ka nxitur mbështetësit të udhëtojnë në Uashington për të protestuar ndaj rezultatit dhe zyrtarët shtetërorë dhe federalë tashmë janë duke u përgatitur për përplasje jashtë Kapitolit. /tesheshi.com/
