Kreu i opozitës, Lulzim Basha vizitoi ditën e sotme zonën e përmbytur në Fushë-Krujë, ku u njoh me problemet e banorëve, të cilët u shprehën të shqetësuar në lidhje me atë që u kishte ndodhur ndërsa u ankuan edhe se askush nuk u kishte ardhur në ndihmë.
Sipas banorëve, shtëpitë e tyre ishin të rrezikuara për shkak të çarjes së argjinaturës së lumit Zezë.
“Është çarë argjinatura komplet. Ka katër ditë sot, po të kishte ra shi mbrëmë sot do të ishim përmbytur prapë. Ishalla nesër e ka dhënë kohë e mirë e shpëtojmë ne si popull. Askush s’ka ardh me pa, as bashki e as qeveri”, – tha një prej banorëve.
“Bëhet fjalë për qindra familje nga këtu e deri në Fushë-Krujë, ndërkohë që jemi këtu bashkë me banorët për të parë situatën nga afër. Tur Bushi ka hallin e hashashit, Ed Rama ka hallin e pikturave. Hallin e njerëzve këtu nuk e qan askush”, – thumboi Basha.
Ai shtoi se Partia Demokratike është bashkë me deputetin për të parë gjendjen nga afër, për të parë se çfarë mund të bëjnë me mundësitë e tyre të kufizuara dhe për t’i bërë thirrje autoriteteve të lënë propagandën, të vijnë këtu, të ndihmojnë njerëzit./tesheshi.com/
