Në qarkun e Shkodrës duket se hapësira e zonave të përmbytura do të zgjerohet. I gjithë territori i vendit është përfshirë nga reshje intensive shiu gjatë orëve të fundit dhe sipas Institutit të Gjeoshkencave, reshjet do të shtohen edhe gjatë ditës së hënë, duke bërë që prurjet në lumin Drin dhe atë të Bunës të shtohen.
IGJEUM thotë se do të vazhdojë rritja e prurjeve edhe gjatë ditës së hënë në pjesët malore të basenit duke përfshirë edhe hidrocentralet mbi lumin Drin.
Uji vijon të mbajë nën kontroll 2.635 hektarë tokë bujqësore në Qarkun e Shkodrës, duke u bërë shkak për dëme të shumta në bujqësi dhe banesa. Situata paraqitet më problematike në Njësinë Administrative Ana e Malit, me 1.220 ha tokë të përmbytura, për t’u pasuar pastaj nga njësitë administrative Dajç, Bushat e Bërdicë.
Plot 140 banesa rezultojnë të bllokuara nga uji në të gjithë qarkun, por vështirësi është hasur në baza ushqimore edhe për gjënë e gjallë. /tesheshi.com/
