Orët e mbrëmjes kanë përkeqësuar situatën në Lezhë ku edhe gjatë ditës ka pasur probleme për shkak të reshjeve të dendura e me intensitet të lartë që përfshinë zonën. Argjinatura e lumit Mat ka pësuar çarje në dy pika si pasojë e prurjeve të mëdha. Në Tale uji ka depërtuar drejt banesave.
Aktualisht në Lezhë ka zbarkuar dhe ushtria, ndërsa në terren janë dy fadroma. Lumi Mat përbën një rrezik serioz edhe për Shënkollin.
Ministria e Mbrojtjes ka dërguar 30 trupa në qarkun e Lezhës, ndërkohë që janë në gatishmëri dhe 6 mjete të kalueshmërisë së lartë të cilat kanë ndërhyrë në përgjigje të kërkesës së emergjencës civile por dhe të vetë banorëve.
Forcat e ushtrisë dhe mjetet kanë ndërhyrë sipas kërkesave të qarkut Lezhë për evakum banorësh në zonat e rrezikuara nga përmbytjet. Ndërkohë që situata është problematike dhe në Fushë-Krujë ku janë tre familje në rrezik përmbytjeje, ndërsa kanë mbërritur forcat e ushtrisë për evakuimin e tyre. /tesheshi.com/
