-Parashikimi: Nga mesi i javës së ardhshme pritet rritja e reshjeve-
Pas 8 muajsh, Vlora dhe Fieri janë përmbytur sërish. Jo në ato përmasa se të shkurtit, kur Vjosa doli nga shtrati, por po aq sa për të vënë alarmin se diçka nuk funksionon, se kanalet kulluese, qoftë në qendra urbane apo në zona rurale nuk e kryejnë si duhet rolin e tyre, apo se dhe hidrovoret nuk i përgjigjen optimalisht situatave me rreshje.
Në një prononcim telefonik për tesheshi.com, ministri i Bujqësisë Edmond Panariti tha se problemet në Vlorë kanë ardhur nga bllokimet e kolektorëve, ndërsa në Fier nga mungesa e energjisë në hidrovorë, duke fajësuar kështu Operatorin e Shpërndarjes së Energjisë.
Shiu i dy ditëve të fundit si pasojë e rreshjeve të dendura dhe të pandërprera ka sjellë përmbytje në pjesën më të madhe të Vlorës.
Policia njofton se janë përmbytur lagjet “24 Maji”, “Pavarësia” dhe “15 Tetori” dhe se janë marrë masat për evakuimin e 8 familjeve nga shtëpitë që janë përmbytur në këto lagje.
Gjithashtu, policia njofton se në disa rrugë të qytetit, si “10 Korriku”, qarkullohet me vështirësi dhe se disa prej segmenteve që lidhin qytetin e Vlorës me Fierin, Orikumin dhe fshatrat përreth, janë të pakalueshme si rezultat i inerteve të shkaktuara nga shirat e rrëmbyeshëm.
Ministri i Bujqësisë shprehu shqetësimin se nga mesi i javës së ardhshme pritet rritja e reshjeve dhe ka gjasa që të sjellë probleme në emergjencat civile. /tesheshi.com/
