“Turqia është e gatshme të ndihmojë Greqinë pas përmbytjeve vdekjeprurëse në Athinë” ka deklaruar ministria e jashtme turke të enjten. “Turqia, në solidaritet me Greqinë, është e gatshme të ofrojë çdo lloj ndihme”, thuhet në një deklaratë të Ankarasë.
“Mësuam me trishtim se përmbytjet që goditën rajonin e Atikës të Greqisë më 15 nëntor 2017, shkaktuan humbje të jetësore dhe dëmtime material”, thuhet më tej në njoftim. “Ankaraja përcjell ngushëllime të sinqerta për të afërmit e atyre që humbën jetën, si dhe për popullin grek dhe urojmë shërim të shpejtë të të dëmtuarve”, shtoi ministria turke e Punëve të Jashtme.
Ajo që nisi si një stuhi e zakonshme u kthye shumë shpejt, në zonat periferike të Athinës në një makth të vërtetë që deri më tani, ka shkaktuar 15 viktima, një bilanc ende i pambyllur, pasi rezultojnë mjaft persona të zhdukur.
Të pallogaritshme dhe dëmet materiale, ku dhjetëra banesa dhe biznese vazhdojnë të jenë të përmbytura, duke rritur ndjeshëm shkallën e shkatërrimit në këtë zonë. Zona perëndimore e Athinës u përballë dhe me ndërprerjen e furnizimit me ujë dhe energji elektrike. /tesheshi.com/
