Natë e pabesueshme në Barcelonë, natë e pabesueshme në “Camp Nou”! Barcelona në çerekfinale të Champions League-s! 6-1 ndaj PSG-së!
Më 14 shkurt, me të mbaruar 4-0 takimi në Paris mes PSG-së dhe Barcelonës, askush nuk u jepte as mundësinë më të vogël katalanasve për t’u kualifikuar.
Por ja që Barcelona është kualifikuar, e madje duke pësuar dhe një gol në fushë të saj, e madje me shpresën të venitur pas këtij goli, e madje kur gjer në minutën e 88-të rezultati ishte veç 3-1. Më pas… tre gola në shtatë minuta, i fundit në të 95-tën!
Kemi parë dramë, por kemi parë dhe teatër pa fund, simulime të njëpasnjëshme të Neymar-it dhe Suarez-it, pre e të cilëve ka rënë gjyqtari Deniz Aytekin, gjermani që gjithmonë është i prirur t’i bëjë ndeshjet çorap.
Kemi parë dhe një PSG teksa luan mjaft keq, kryekëput ndryshe paraqitjes në Paris. Kemi parë dhe një Cavani që gjithsesi ka bërë detyrën e tij, duke vrapuar dhe shënuar, edhe pse në mbarim të lojës goli i tij rezultoi i pavlerë.
Rrjedhja e lojës qe e tillë: Suarez shënoi që në minutën e 3-të, Kurzawa realizoi një autogol në mbarim të pjesës së parë, Messi kthen në gol një 11-metërsh në minutën e 50-të. Një 11-metërsh që pak të thuash se ishte i dyshimtë! Cavani realizon në të 62-tën minutë me një të djathtë të fortë: 3-1! Rrebeshi katalanas rinis në minutën e 88-të, kur shënon Neymar, që tre minuta më pas tund rrjetën sërish nga pika e penalltisë. Në minutën e 95-të shfaqet Sergi Roberto, që i jep kualifikimin Barcelonës: 6-1!
Dramatike, historike, e papërshkrueshme!
Në takimin tjetër të mbrëmjes së Champions-it, ku askush nuk e kishte mendjen, Borusia e Dortmundit shkatërroi Benfikën, duke fituar 4-0 e duke u kualifikuar për në çerekfinale pasi ndeshjen e parë e kishte humbur ngushtësisht, veç 1-0. Aubameyang qe shënuesi i tre golave, përpos një të Pulisic-it. /tesheshi.com/
