Derbi i pabesueshëm i Italisë, duke huazuar një titull të një raportimi elektronik, ka patur një fund shkatërrues për Interin pritës, ndërkohë që i ka buzëqeshur Juventusit.
Torinezët bënë një përmbysje prej kampionësh në tre minutat e fundit të lojës, kthyen rezultatin dhe ruajtën kështu kryesimin në Serinë A dhe për këtë fundjavë.
Takimi në “Giuseppe Meazza” u mbyll 2-3 për Juventusin, që shkoi në kuotën e 88 pikëve, katër më shumë se Napoli që nesër do të luajë në fushën e Fiorentinës.
Douglas Costa shënoi për Juventusin në minutën e 13-të, dhe hallet për vendasit u shtuan pesë minuta më pas, kur Vecino doli me karton të kuq.
Interi u zgjua në pjesën e dytë. Goli i Icardi-t dhe autogoli i Barzagli-t u dhanë epërsinë pritësve. Drama do të niste në minutën e 87-të, me Juventusin që barazoi shifrat. Dhe Higuain që kishte 716 minuta pa shënuar, një rekord negativ për të në futbollin italian, tundi rrjetën e Interit në minutën e 89-të.
Tronditjen e Interit për humbjen e ilustrojnë lotët e Icardi-t në fund të ndeshjes, kurse tekniku Spalletti deklaron se është e vështirë të pranohet ajo që ngjau.
Atmosferë krejt tjetër te Juventusi. “Ky është futbolli,” u shpreh Higuain para mikrofonave të reporterëve. “Këtë herë e kthyem lojën me uri, krenari, me etje për fitore.”
Juventusi luan javën e ardhshme ndaj Bolonjës, më pas ka transfertën e Romës, dhe e mbyll kampionatin me takimin ndaj Veronës.
Interi mbetet me këtë humbje jashtë katërshes së parë tani për tani, sido që mund të shpresojë akoma për një renditje që do të t’i sigurojë pjesëmarrjen në Champions League sezonin e ardhshëm. /tesheshi.com/
