Ka patur dhunë sot në rrugët e kryeqytetit francez ndërsa është protestuar sërish për reformën e punës. Sindikata e grupe studentësh kanë dalë edhe një herë në rrugë si në Paris, po ashtu dhe në qytete të tjera të Francës.
Protestat e sotme janë më të fundit në një seri të gjatë të tillash që prej muajit mars. Protestuesit pretendojnë se reforma e re e punës do ta dobësojë sigurinë e punës, pasi e bën më të lehtë si marrjen por edhe nxjerrjen në rrugë të punëtorëve.
Policia franceze njoftoi për 26 të plagosur gjatë protestave, 20 prej të cilëve u përkasin forcave policore. Më së paku 21 persona janë arrestuar në Paris.
Përplasje pati pranë stacionit hekurudhor Port Royal, dhe dhjetëra njerëz, përgjithësisht me fytyrën të mbuluar, hodhën gurë dhe fishekzjarre mbi policinë, e cila nga ana e saj përdori gazin lotsjellës.
Protesta të ngjashme ka patur dhe në Tuluzë, e po ashtu dhe në Nantë, pavarësisht ndalimit të manifestimeve.
Zhvillimi i Kampionatit Europian në Francë e bën situatën më të rëndë, ndërsa shumë shërbime janë pezulluar në kohë të ndryshme, duke filluar nga ato të transportit. /tesheshi.com/
