“’Fatkeqësi është që ka njerëz në kuvend që çojnë përpara Islamin në vend të të drejtave të njeriut’, tha gazetari në një debat me deputeten e Kosovës Dude Balja. Cili gazetar? Quhet Vullnet Krasniqi, zbulim i një prej mediave të Tiranës, për t’u ftuar për çështje të nxehta.
Ani se ç’kapacitet ka, pasi mjafton kjo deklaratë që atij t’i thuhet dashamirësisht që ta lërë këtë punë – gazetarinë e të merret me diç tjetër, mjaft të nderojë veten, edhe në qoftë një profesion jashtë sferës sociale apo komunikative.
Quan fatkeqësi atë që në fakt është fatkeqësia e mendjes së tij të cungët, pasi ndërsa deputetja përballë mbron të drejtat e njeriut – të drejtën e femrës për të vënë shami kur të dojë ajo e jo shteti – ai pason me frazën e mësipërme, ku Islamin, dukshëm duke qenë një profan katastrofik në njohjen më minimale të këtij besimi, e trajton si të kundërtën e të drejtave njeriut. Qartazi që është i paditur, në diskutim është ligësia e tij.
Tjetër çështje janë kriteret që zgjedh media për të patur në debate për çështje të nxehta individë që s’kanë minimumin e prestigjit gazetaresk, ose kulturës apo formimit më minimal për të qenë dinjitozë në atë që thonë. Sepse ndoshta individi s’ka respekt për veten, por media duhet ta ketë. /tesheshi.com/
