Masakra e fillimvitit në Ortakoj të Stambollit, që u mori jetën dhjetëra personave, u shoqërua me lajme që flisnin për dijeni të strukturave përkatëse amerikane për sulmin terrorist e për paralajmërim të autoriteteve turke.
Më shumë se një informacion mediatik në një moment të vështirë për Turqinë, lajmi i shpërndarë rrufeshëm synonte t’i vinte me shpatulla pas muri autoritetet turke, ta paraqiste në një këndvështrim negativ qeverisjen e sotme në vendin më të goditur nga terrorizmi gjithfarësh.
Ambasada e SHBA-së në Ankara është shtrënguar të reagojë me këtë rast, duke i hedhur poshtë zërat se ka patur informata të mëhershme mbi atë se çfarë do të ngjiste në klubin e natës në Stamboll.
“Në kundërshtim me zërat që qarkullojnë në median sociale, qeveria e SHBA-së nuk kishte asnjë informacion mbi kërcënime për vende specifike zbavitjeje, duke përfshirë klubin Reina, dhe qeveria e SHBA-së nuk i paralajmëroi amerikanët të qëndrojnë larg lagjeve apo vendeve të posaçme,” thuhet në njoftimin e ambasadës amerikane.
Siç raporton shtypi turk, ambasada e SHBA-së në Ankara ka sqaruar se më 22 dhjetor ishte bërë një paralajmërim i përgjithshëm për “Turqinë dhe për pjesë të ndryshme të Europës”. “Siç bëjmë,” ka pohuar e nënvizuar ambasada amerikane, “kurdo që ka shenja se qytetarët amerikanë mund të vihen në shënjestër apo të bien pre e dhunës.”
Pretendimet morën dhenë kur pronari i klubit të natës ku ndodhi gjakderdhja, Mehmet Koçarsllan, deklaroi se burimet amerikane kishin informata për sulmin. Një deklarim i qartësuar më vonë po prej tij, duke thënë se SHBA-ja i kishte paralajmëruar qytetarët e saj për sulme të tilla. /tesheshi.com/
