Presidenti i Kosovës, Hashim Thaçi, në një leksion të hapur mbajtur në Tiranë pranoi se komuniteti serb atje ka më shumë të drejta se shqiptarët…
Përkulja e Presidentit të Kosovës, Hashim Thaçi, para një memoriali të ngritur për disa të rinj serbë të vrarë në vitin 2003, zemëroi jo pak shqiptarët atje, në një koëh kur Serbia akoma nuk ka kërkuar falje dhe s’ka pranuar genocidin ndaj shqiptarëve të Kosovës. Duke ndjekur politikë të butë ndaj Serbisë që pas Pavarësisë, Thaçi e mbrojti këtë veprim të tij, duke shtuar madje se shqiptarët pas luftës nga viktima u kthyen në agresorë.
Gjatë një leksioni të hapur me studentët në UET të Martën ai u pyet mbi këtë veprim dhe për trajtimin e veçuar të komunitetit serb në Kosovë.
“Ju e keni parë që unë kam vizituar memorialet serbe, por unë e di shuë mirë që Serbia ka kry genocid në Kosovë dhe këtë e kam thënë shpeshherë edhe në Këshillin e Sigurimit. Mirëpo është e vërtetë që kanë ndodhur gjëra të pahijshme në veçanti në periudhën e pasluftës. Gjatë tërë luftës asnjë kishë serbe nuk është dëmtuar nga UÇK-ja. Po çfarë ndodhi pas luftës? U dëmtuan disa kisha, kjo smund të mohohet. A fituam diçka? Jo! Po paguajmë një çmim sot. Në vitin 2004 pas incidentit që ndodhi në Mitrovicë ndodhën ato trazirat krejt të panevojshme dhe nga viktima shqiptarët u shndërruan në agresorë. Më vjen keq por ky është realitet dhe filluam të shihemi me sy jo të mirë. Pra sa ma tepër tolerancë sa ma tepër pajtim sa ma tepër mirëkuptim unë besoj fuqishëm se Kosova do të lëviz me hapa të sigurt drejt prespektivës euroatlantike”- u shpreh Thaçi.
Kreu i shtetit të ri të Kosovës pranoi se në rrafshin në e demokracisë ka një diskriminim pozitiv për komunitetin serb duke u dhënë më shumë të drejta, por ai tha se kjo nuk prish punë dhe bëhet për të ardhmen. “Jam i vetdijshëm se 3 për qind i komunitetit serb gëzojnë ma tepër të drejta se 30 përqidn e shqiptarëve atje”- tha Thaçi.
Më tej ai foli dhe për divergjencat që ka me shqiptarët e trevave të tjera.
“Unë akuzohem për dokumentin Ahtisari, akuzohem dhe për Rambujenë, akuzohemi edhe pse nuk kemi bashkuar shqiptarët në Preshevë e Maqedoni. Por dhe ata që i vazhduan ato luftra, pastaj të gjithë ranë në sistemin e vlerave tona. Pse shpërtheu lufta në Preshevë? Pikërisht prej individëve që kanë shpërthyer luftën atje jemi akuzuar se misioni i çlirimit kombëtar ka mbet në gjysëm. Edhe në Maqedoni, miku im Ali. Por në fund u ul në tavolinë dhe doli në deklarata; respektojmë integritetin territorial të Maqedonisë, përbërjen shumëetnike dhe atdheun tim Maqedoninë.
Unë nuk i akuzoj sepse i kuptoj shumë drejt. Mirëpo duhet të jemi shumë realist në atë se çfarë mund të realizojmë dhe në atë se çfarë kemi ëndërruar dhe ëndërrojmë”- tha Thaçi.
President sërish? Vetëm nga populli
Thaçi mbrojti idenë se presidenti i Kosovës duhet të zgjidhet nga populli për të mos u bërë pjesë e pazareve të partive politike. Ai tha se propozimet e tij për ndryshime kushtetuese nuk kërkonin rritje kompetencash apo kthimin në një republikë presidenciale por thjesht kapërcimin e ngërçit të zgjidhjes së presidentit.
I pyetur nëse do të kërkonte një mandat të dytë presidencial për vete ai tha se; “nëse zgjidhem nga populli, po do ta kërkoj një mandat të dytë, por nuk do të rikandidoj nëse do të bëhet zgjedhja në parlament sepse nuk dua të bëhem pjesë e pazarave politike”.
Më tej duke komentuar moshën e tij të re me detyrën që ushtron dhe çdo të bëjë pas presidencës Thaçi tha se “nuk e di me çfarë do të merrem, se kam menduar, por e qartë është se nuk do të rikthehem kryetar partie dhe as kryeministër më”. /tesheshi.com/
