Në Tiranë është organizuar një ceremoni përkujtimore në 2-vjetorin e grushtit të shtetit në Turqi.
Ka qenë Ambasada e Turqisë në Tiranë, Ministria e Rinisë dhe e Sportit e Republikës së Turqisë dhe Agjencia Turke për Bashkëpunim dhe Koordinim (TIKA), të cilat ndanë me autoritetet dhe zëra publikë shqiptarë, përjetime mbi ato të tmerrshme të një vendi që e ka pësuar rregullisht nga grusht-shtetet, por që kësaj here arriti ta zhbëjë në pak orë kërcënimin e një kaste ushtarakësh ndaj rendit kushtetues. E pranishme në ceremoni ishte dhe gruaja simbol e asaj nate, Nihal Olçok, bashkëshortja e Erol Olçok dhe nëna e Abdullah Tajjip Olçok, pra babë e bir të vrarë nga trupat puçiste.
Ambasadori i Turqisë në Tiranë, Murat Ahmet Yoruk, tha se tentativa për grusht shteti e FETO-s ishte sulmi më i rëndë kundër rendit kushtetues demokratik, të drejtave dhe lirive themelore të shtetasve turq dhe sigurisë kombëtare.
“Gjatë kësaj tentative për grusht shteti që kishte vënë në shënjestër vullnetin, unitetin, tërësinë dhe demokracinë e vendit tonë, me thirrjen e presidentit tonë Recep Tajjip Erdogan me miliona shtetas u bashkuan si një trup i vetëm”, tha kreu i diplomacisë së Ankarasë në Tiranë.
Ai më pas bëri dhe një rezyme të FETO-s, tiparëve të saj si organizatë, nën akuzë për ideimin e grushtit të shtetit.
“Karakteristikat tipike të kësaj organizate janë pastrimi i parave, shpifjet, falsifikimi i dokumenteve zyrtare, evazioni fiskal, konspiracioni, mbyllja në vetvete, prodhimi i fakteve false në labirintin e obskurantizmit, organizimi në celula dhe larja e trurit. Organizata është e shkrirë me krimin. Kështu pjesëtarë të FETO-s të arratisur drejt Shqipërisë pas 15 korrikut janë kapur në Shqipëri me karta identiteti dhe pasaporta false”, tha ambasadori turk.
Ai theksoi se “pastrimi i kësaj organizate nga Shqipëria para së gjithash është në të mirë të Shqipërisë dhe shqiptarëve. Kur ne themi se kjo organizatë duhet asgjësuar plotësisht në këtë vend, duam që ajo që na ndodhi neve në sytë e të gjithë botës të mos u ndodhë edhe vëllezërve tanë shqiptarë. Sepse organizata është e njëjta organizatë. Funksionimi i saj është i njëjtë me atë në Turqi ose në vendet e tjera të Ballkanit”. /tesheshi.com/
