Nga Shkodra, ku ishte i pranishëm në përkujtimin e masakrës së 2 prillit të vitit 1991, kreu i Partisë Demokratike paralajmëroi kryeministrin Rama se vala e protestës që nisi në Kukës nuk do të ndalet. Sipas tij, Rama i ka bërë hesapet gabim.
“Njësoj si etërit e tij politikë, Edi Rama e ndëshkon Shkodrën, sepse pushteti është për të shtypja dhe shfrytëzimi, arroganca, dhe paraja dhe luksi për veten. Kukësi u përball dhe e ndali të keqen dhe së bashku me Kukësin ne do ta ndalim atë. Le të jetë kjo nisja e pranverës së madhe që po vjen. Të shkëpusim njëherë e mirë lidhjet e krimit me politikën.Një PD e çliruar nga korrupsioni dhe oligarkët ka vetëm një interes, interesin e shkodranëve, interesin e shqiptarëve. Zotohem në këtë altar të demokracisë se gjithçka që kemi denoncuar deri më sot nuk do ta falim: askënd!! Që nga kryeministri deri tek punonjësi më i thjeshtë të japin llogari për dhunimet që i kanë bërë ligjit”, deklaroi Basha.
Basha u ka bërë thirrje qytetarëve të reagojnë pasi nuk ka rrugë tjetër përveç përballjes me të keqen, qeverisjen aktuale të kryeministrit Edi Rama. /tesheshi.com/
