Emërim tronditës është cilësuar caktimi i Boris Johnson-it si sekretar i Jashtëm në qeverinë e re britanike të kryesuar nga Theresa May.
Ish-kryebashkiaku i Londrës është i njohur për qëndrimin e tij të spikatur pro Brexit-it, duke qenë në rreshtin e parë të atyre që bënë fushatë për daljen e Britanisë nga BE-ja.
Po ashtu ai është i njohur për qëndrimin antiturk, për euroskepticizmin e tij, si dhe për një sërë deklaratash më së paku aspak diplomatike, edhe karshi presidentit amerikan Barack Obama.
Dy janë titujt që The Guardian i kushton Boris Johnson-it dhe emërimit të tij si sekretar i Jashtëm: Johnson dhe diplomacia nuk janë sinonime, si dhe, Një karrierë me gafa ndërkombëtare.
Më të ashpër kanë qenë liberaldemokratët britanikë, të cilët e kanë denoncuar emërimin e tij, duke deklaruar se Theresa May e ka humbur besueshmërinë si kryeministre pas 90 minutash me këtë vendim.
Liberaldemokratët pretendojnë se me këtë lëvizje May ka treguar se nuk është serioze mbi negociatatat për një marrëveshje me Europën.
Tim Farron, udhëheqësi i liberaldemokratëve do të deklaronte: “Nuk mund ta besoj që Boris Johnson do të jetë tani personi që do ta përfaqësojë jashtë Britaninë.”
Vetë Boris Johnson e ka përshkruar me pak fjalë emërimin, duke e quajtur veten të përulur e krenar për ofrimin e një mundësie të tillë. /tesheshi.com/
