Ish-deputeti i LDK-së Shpejtim Bulliqi, i cili nuk u fut në listën e LDK-së për kandidat për deputet, ka thënë se si pasojë e eliminimit të njerëzve të spikatur nga lista, partia e tij tashmë ka një rezultat të dobët.
Ai tha se për këtë fajin nuk e ka vetëm vetëm kryetari i partisë, por e gjithë kryesia e LDK-së, që, sipas tij, duhet të mbajë përgjegjësi, madje deri në dorëheqje.
“Ne nuk mund ta akuzojmë një individ, në këtë rast, Isa Mustafën, si kryetar i LDK-së. Unë them që komplet kryesia e LDK-së është pjesë e këtij faji, të kësaj rënie drastike në nivel vendi… Dhe e njëjta duhet të reflektojë, të japë dorëheqje, gjithsesi,” ka deklaruar Bulliqi në Tv Dukagjini.
Bulliqi është shprehur se nëse një reformim nuk ndodh së shpejti, LDK-ja do ta marrë goditjen e radhës edhe në zgjedhjet lokale, të cilat do të mbahen në vjeshtë.
“Po, do të na japë prapë vendin elektorati. Kjo situatë që doli nga këto zgjedhje të përgjithshme, mendoj që në disa komuna është kartoni i verdhë, e në disa komuna është kartoni i kuq,” është mendimi i tij.
Kujtojmë se Bulliqi nuk u bë pjesë e listës për shkak se ishte deputeti më i zëshëm kundër Demarkacionit me Malin e Zi. /tesheshi.com/
