Nga Blendi Gashi
Agjencia e Kosovës për Akreditim (AKA) është përjashtuar të martën nga Regjistri Evropian për Sigurimin e Cilësisë në Arsimin e Lartë (EQAR), kjo pas vendimit të marrë nga ministri i Arsimit, Shyqiri Bytyqi, më 25 shtator të vitit të kaluar, me kërkesë të kryeministrit Ramush Haradinaj, për shkarkimin e Këshillit Shtetëror të Cilësisë (që njihet si Bordi i Agjencisë së Akreditimit), si dhe ushtruesen e detyrës së drejtorit të Agjencisë për Akreditim, me arsyetimin se procesi i akreditimit është përcjellë me shumë “parregullësi”.
Në vendimin për përjashtim të EQAR thuhet se “Komiteti i Regjistrit ka konstatuar se pas vendimit të ministrit të Arsimit, Shkencës dhe Teknologjisë për shkarkimin e Këshillit Shtetëror të Cilësisë dhe të u.d. të drejtoreshës së Agjencisë së Akreditimit të Kosovës, kjo agjenci ka humbur aftësinë e saj për të vepruar në mënyrë autonome”.
Pra vendimi e cek qartë se përjashtimi bëhet për shkak se politika ka shtrirë duart në arsim, ndërsa dëmet do jenë të mëdha pasi përjashtimi i AKA-së nga EQAR do të thotë që diplomat e studentëve kosovarë të mos njihet në Evropë.
Përjashtimi nga EQAR, goditje e madhe për arsimin
Ky vendim ka alaruar njohësit e arsimit në Kosovë, por edhe deputet e organizata të caktuara studentore, çka kërkojnë përgjegjësi nga ministri i Arsimit dhe kryeministri, ndërsa kërkojnë menjëherë të ndërhyhet dhe të rikuperohet dëmi.
Jusuf Thaçi, njohës i fushës së arsimit ka kërkuar përgjegjësi nga institucionet e vendit, duke thënë se qeveria dhe MAShT-i duhet të marrin masa të menjëhershme për të rikuperuar dëmin e madh në arsim.
“Ky përjashtim i AKA-s nga EQAR mund të ketë pasoja të mëdha për arsimin e lartë të Kosovës. Pas këtij vendimi, AKA më nuk shihet si kredibile nga institucionet simotra evropiane e ndërkombëtare, rrjedhimisht diplomat që lëshohen nga institucionet e arsimit të lartë të Kosovës, publike e private, mund të mos njihen si kredibile apo edhe mund të kontestohen e të mos pranohen nga universitete e shtete të ndryshme evropiane e ndërkombëtare. Ky është një prapakthim i pafalshëm në fushën e arsimit të lartë të Kosovës dhe institucionet e vendit duhet dhënë përgjegjësi për këtë. Veç kësaj, Qeveria e Kosovës dhe Ministria e Arsimit duhet urgjentisht të ndërmarrin të gjitha veprimet e nevojshme që të rikuperohet ky dëm i madh për arsimin e lartë të vendit”, shkruan Thaçi në Facebook.
Dukagjin Popovci, poashtu njohës i arsimit përjashtimin nga EQAR e sheh si një mesazh të qartë për klasën politike të Kosovës se vendimet nuk merren duke u bazuar në argumentin e fuqisë, por në fuqinë e argumentit.
“Mesazhi që ju ka shkuar vendeve evropiane është se në arsimin e lartë të Kosovës nuk ka një proces të besueshëm të akreditimit, prandaj diplomat e fituara duhet të shihen me dyshim. Nuk është se, edhe më herët, nuk kanë pasur arsye të dyshojnë në cilësinë e diplomave të Kosovës, por tani ky dyshim është legjitimuar me një vendim zyrtar të një institucioni evropian”, thotë Popovci, ndërsa shton se për hirë të rinjëve duhet të merren të gjithë hapat e mundshëm për të minimizuar dëmin.
Reagojnë deputetët…
Ashpër ka reaguar edhe deputetja e PDK-së, Ganimete Musliu e cila ka kërkuar përgjigje nga ministri i Arsimit, Shyqiri Bytyqi.
“ALARM!!! Agjencia e Akreditimit e Kosovës është përjashtuar nga EQAR ( Asosacioni Evropian për Sigurim të cilësisë në Arsimin e Lartë) si pasojë e nderhyrjeve politike në këtë Agjenci. Përjashtimi i AKA-se nga ky institucion d.m.th që diplomat e studentëve kosovarë do shihen me një sy tjetër në Evropë. Ministër a ke diçka me na thanë???”, shkruan ajo në Facebook.
Kurse deputeti i LDK-së, Fidan Rekaliu ka paralajmëruar se do të kërkojë përgjigje nga anëtarët e Komisionit Parlamentar për Arsim, si dhe do të kërkojë informata shtesë nga MAShT.
“Përveç dëmtimit të reputacionit të vendit, ky akt ka edhe dëme për studentët kosovarë, duke krijuar mundësi për mos-njohje të diplomave të tyre. Kjo sjellje e papranueshme tregon edhe njëherë nevojën për ndryshim të shpejtë të kësaj qeverisje”, shkruan ndër të tjera në Facebook Rekaliu.
Ka reaguar edhe Lëvizja Studentore Për Barazi “Studim Kritikë Veprim” e cila thotë se përjashtimi ka ndodhur si pasojë e ndërhyrjeve për të instaluar njerëz të pushtetit aktual, ndërsa thonë se ky është një izolim i vërtetë për arsimin kosovarë.
Kjo lëvizje studentore thotë se përgjegjës për këtë gjendje të krijuar e mbajnë kryeministri e ministri i Arsimit, për çka thonë se ky i fundit duhet sa më parë t’i drejtohet Komisionit të Regjistrit Evropian për Sigurimin e Cilësisë në Arsimin e Lartë dhe t’i ofrojë sqarime për arsyet e shkarkimit të bordit të kaluar të AKA-së.
“Për shpërfilljen e neglizhencën e deritanishme gjithsesi se duhet të jepet përgjegjësi. Ministri dhe Kryeministrit sipas Ligjit për Arsimin e Lartë , duhet menjëherë t’i raportojë Kuvendit të Republikës së Kosovës për arsyet e shkarkimit të Bordit të AKA-së, si dhe t’i njoftojë sa më parë për të gjitha shkeljet e supozuara mbi të cilat është marrë vendimi për shkarkimin e tyre”, thotë SKV.
