Ish-kreu i Rendit në qeverinë “Rama 1”, Saimir Tahiri ka mohuar çdo lidhje mes tij dhe dy trafikantëve droge, një prej të cilëve Moisi Habilaj, të cilët gjatë përgjimeve të hetuesve italianë kanë përmendur emrin e tij. “Pallavra” i ka quajtur ato Tahiri, duke i komentuar si biseda shitmendjeje mes trafikantësh, që sipas tij nuk e kanë për gjë që të përmendin emra pushtetarësh.
“Sot është dita e kundërshtarëve të mi të shfrytëzojnë pallavrat e dy kriminelëve që mburren kush ka mbështetje”, u shprehet Tahiri, teksa thekson se “Sado e madhe qoftë gënjeshtra dhe abuzimi, e vërteta është aty. Kam mbajtur detyrën e Ministrit të Brendshëm më gjatë se çdo kush, kam luftuar çdo ditë për të bërë detyrën me përgjegjësi”, tha Tahiri.
Tahiri e ka pranuar faktin se Habilajn e ka një kushëri të largët, brezi i dhjetë, siç tha ai, e se kishte bërë gabimin më të madh të jetës që i kishte shituar automjetin e tij personal, pa e verifikuar se me ç’merrej e se kush ishte në të vërtetë. Për këtë, ai tha se mban përgjegjësi morale. Më pas, ai tha përgjegjësinë e tij e shtrin deri tek kërkësa për hetime të imtësishme, siç tha, për të dalë e vërteta.
“Dy kriminelë që janë kushërinjtë e mi në shkallën e 10-të, si çdo kriminel përmendin emra ministrash, unë nuk jam i pari. Kërkoj nga Prokuroria që të hetohet gjithçka. Kam bërë gabimin e vetëm që u kam shitur makinën personale. Mbaj përgjegjësi personale të plotë. Përtej kësaj nuk mbaj asnjë përgjegjësi. Të dënohen çdo kriminel, qoftë kushërinjtë e mi të shkallës së 10-të”, shtoi ish-kreu i Rendit.
Tahiri tha se nuk i përket asaj race që i ikën përgjegjësië, duke aluduar tek Meta e Berisha, pasi për njërin tha se u kap duke vjedhur e për tjetrin që vrau në bulevard.
“Sot nuk kërkoj nga askush që të më mbrojë dhe besoj, nuk kam ndërmend t’i shtrijë dorën askujt. Unë të pres deri në fund çdo hetim dhe do të përkushtohem vetë që e vërteta të dalë në dritë. Do të shoh në sy këdo, cilin do që është i bindur, këtë të vërtetë do ta çoj deri në fund. Jo me fjalët e mia, por në çdo hapësirë të drejtësisë”, u shpreh ministri i Rendit në “Rama 1”. /tesheshi.com/
