Ditën e sotme është regjistruar fenomeni më i çuditshëm që sipas të gjitha gjasave nuk ka ndodhur në asnjë vend normal.
Një ministër shkon në zyrën e Kryeprokurorit dhe i kërkon që të hetojë një koleg të tijin në qeveri.
Në fakt kështu ka ndodhur: Ylli Manjani, ministër i Drejtësisë është takuar me Prokurorin e Përgjithshëm dhe në dalje të tj deklaroi se ministri i Brendshëm, Saimir Tahiri është nën hetim për çështjen e përgjimit.
Dhe fill pas këtij veprimi kanë dalë Sali Berisha, Lulzim Basha, Presidenti Nishani duke i bërë thirrje gjithashtu Prokurorit të Përgjithshëm që të hetojë Saimir Tahirin.
Ndërsa vetë ministri i Brendshëm, nga selia e PS-së, ka qenë mjaft i qetë: “Le të hetojnë, nuk do të gjejnë asgjë pasi policia nuk ka përgjuar, ne thjesht punojmë me partnerët”.
Pas ministrit të tij ka dalë edhe Edi Rama, i cili sërish i qetë ka shkruar: “Hall i madh Reforma në Drejtësi, tani u bëhet edhe sikur i përgjojnë”
Siç mësohet nga purime pranë organeve të sigurisë, alarmi i madh është bërë pasi në një media të rëndësishme të një vendi fqinj, janë depozituar tabulate telefonike që mund të kompromentojnë zyrtarë të sërës së lartë në Shqipëri.
Bëhet fjalë për lidhje me njerëz të nëntokës; por ajo që është më e rëndësishmja, për një komunikim intensiv në lidhje me reformën në drejtësi. Ndaj edhe Edi Rama përmend reformën duke e lidhur me përgjimin.
Përpara ardhjes në Tiranë të zv.presidentit të SHBA-së Joe Biden, gjërat po lëvizin me një shpejtësi marramendëse duke mos kursyer asgjë.
Dhe mundet që takimi i sotëm i Ylli Manjanit në zyrën e Adriatik Llallës të ketë arritur fundin për marrëdhënien mes Partisë Socialiste dhe Lëvizjes Socialiste për Integrim. Sipas të gjitha gjasave, kjo aleancë ka rënë që me rastin e Shuke Xhelilit, pasi siç dhe është vënë re, në dy ditët e fundit ka pasur qëndrime të egra nga dy anëtarë qeverie.
Saimir Tahiri tha “që e keqja ndodhet përtej opozitës”. Kurse Ylli Manjani kërkoi hetim për kolegun e tij.
Takimi i së mërkurës mes Ramës dhe Metës do të jetë vendimtar për këtë marrëdhënie.
Mësohet se gjithçka ka shpërthyer mbi një material që ka mbërritur në redaksinë e “Corriere della Sera”-s.
Në numrin e sotëm, e përditshmja italiane i ka kushtuar shkrimin pasurisë dhe trafikut të të ashtëquajturit “Escobarit” të Ballkanit.
“Që në drejtësinë shqiptare, diçka nuk funksion është fakti i njohur. Kriminelët mjaft pranë arrestimit nga investiguesit e huaj, lajmëroheshin në kohë e arratiseshin duke mos u gjetur më. E konsideruar si ‘Kolumbia e Europës’ për prodhimin e lëndëve narkotike, rafinerive të saj e klaneve që bëjnë miliona me drogën, Shqipëria jeton një luftë të egër mes shërbimeve sekrete e qeverisë. Të parët akuzojnë të dytët për autorizime ilegale të përgjimeve, falë instrumentave të prodhuara nga një shoqëri italiane, e që kalonin përmes kanalit diplomatik italian, drejtuar nga Anna Poggi, që koordinonte punën mes forcave të Interpolit”, shkruan gazeta italiane.
Por problem është se ditët e ardhshme pritet që dosja “Balili” të zbërthehet dhe të shkojë në majat e politikës shqiptare.
Italianët citojnë si burim pikërisht shërbimin sekret Italian, i cili ka arritur që nëpërmjet komunikimit të trafikantëve me partnerët e tyre në Itali, të zbulojë kokën e vërtetë të trafikut dhe rrugën e parave. Që sipas gjasave kalojnë pikërisht tek reforma në drejtësi.
Përgatiti: Ylli Pata – /tesheshi.com/
