Udhëheqësi i ri i laburistëve britanikë, Jeremy Corbyn, ka dhënë dje një intervistë për Huffington Post-in, duke dashur të përshkruajë 100 ditët e para në detyrë.
Ndërsa ka prekur shumë tema, Corbyn i ka lënë vend dhe një përgjigjeje ndaj komenteve të Donald Trump-it mbi muslimanët në Mbretërinë e Bashkuar dhe mbi idenë për t’i ndaluar muslimanët në tërësi të hyjnë në SHBA.
Ai e ka ftuar republikanin Trump, që aspiron të jetë kandidat për president i SHBA-ve, të vijë në Londër e ta vizitojë xhaminë e Finsbury Park-ut, për ta parë vetë Islamin në Britani.
“Nëse Donald Trump-i dëshiron të vijë në Britani, hata fare; ai mund të vijë dhe të më bashkohet mua në xhaminë e Finsbury Park-ut (Finsbury Park Mosque). E pas kësaj mund të vijë në sinagogë. Ne mund të kemi një bisedë atje. Ne ia dalim të kemi një shoqëri koherente, multifetare e multikulturore në Londër, në Birmingam, në Lestër, në të gjithë pjesët e këtij vendi. Ai është i mirëpritur të vijë dhe të shohë. Mund të mësojë diçka,” është shprehur fjalë për fjalë Jeremy Corbyn.
Donald Trump do të deklaronte më 8 dhjetor se ca pjesë të Londrës ishin aq të radikalizuara, sa punonjësit e policisë druheshin për jetën e tyre. Gjë e cila ka sjellë reagimin e mbi gjysmë milioni njerëzve në Mbretërinë e Bashkuar, që kanë nënshkruar një peticion ku kërkohet të ndalohet hyrja e tij në Britani.
I pyetur rreth kësaj çështjeje, Corbyn ka thënë, “Nuk do ta ndaloja atë të vinte në Mbretërinë e Bashkuar.”
E lidhur me propozimin e Trump-it për t’i ndaluar muslimanët të hyjnë në SHBA, udhëheqësi laburist ka nënvizuar: “Shpresoj që populli amerikan ta kuptojë se kjo është kundër gjithçkaje që gjendet në kushtetutën e SHBA-ve, kundër gjithçkaje që ka të bëjë me lirinë e fjalës, gjithçkaje që ka të bëjë me lirinë e fesë.” /tesheshi.com/
