Presidenti i Komisionit Europian, Jean-Claude Juncker njoftoi planet që sipas tij, do të jenë një përgjigje e shpejtë, e vendosur dhe bashkëpunuese e Europës ndaj krizës së refugjatëve.
Sipas këtij plani, 120 mijë azilkërkues shtesë do të shpërndahen mes vendeve të Bashkimit Europian, me kuota që janë të detyrueshme për secilin prej tyre.
Kjo “përgjigje” europiane vjen në një kohë që vala e emigrantëve sirianë që i ikin luftës në vendin e tyre ka mbërritur edhe në veri të Europës, gjatë ditëve të fundit.
Juncker deklaroi në parlamentin Europian se nuk është koha për të pasur druajtje. Ai u kundërshtua në komentet e veta nga politikani euroskeptik, britaniku Nigel Farage, por i hodhi poshtë deklaratat e këtij të fundit si të “pavlera”.
Gjermania, si shteti-destinacion për shumë refugjatë, mbështeti kuotimin, por disa vende kundështuan vendosjen e këtij sistemi.
Planet e Juncker u parashtruan në një lloj fjalimi “drejtuar kombit” gjatë të cilit ai zakonisht deklaron prioritetet e Komisionit Europian.
Këtë vit, ai e nisi fjalimin duke thënë se Bashkimi Europian nuk është në një gjendje të mirë. “Ka mungesë të Europës në këtë bashkim, dhe mungesë të bashkimit në këtë union”, tha ai. /tesheshi.com/
