Pasi Shtëpia e Bardhë i bëri thirrje Kinës për të treguar të dhëna nga ditët e para të pandemisë COVID-19, ambasada kineze në Uashington tha se Shtetet e Bashkuara nuk duhet të “drejtojnë gishtin” nga Kina dhe vendet e tjera që mbështetën Organizatën Botërore të Shëndetësisë gjatë pandemisë.
“Shtetet e Bashkuara kanë dëmtuar bashkëpunimin shumëpalësh dhe nuk duhet të drejtojnë gishtin nga Kina dhe vendet e tjera që mbështetën OBSH gjatë pandemisë COVID-19,” tha ambasada kineze.
Një zëdhënës i ambasadës, duke iu përgjigjur një deklarate nga Këshilltari i Sigurisë Kombëtare të SHBA Jake Sullivan, tha se Kina e mirëpriti vendimin e Uashingtonit për t’u bashkuar me OBSH, por duhet t’i përmbahet “standardeve më të larta” në vend që të synojë vendet e tjera.
Hetimi i origjinës së koronavirusit
Shtëpia e Bardhë i bëri thirrje Kinës të shtunën për të vënë në dispozicion të dhëna nga ditët e para të shpërthimit të pandemisë COVID-19 dhe tha se ishte “thellësisht e shqetësuar” për mënyrën se si u prezantuan gjetjet e para të OBSH-së për origjinën e koronavirusit.
Sullivan tha se ishte e domosdoshme që raporti të ishte i pavarur dhe pa “ndryshime nga qeveria kineze” dhe përsëriti shqetësimet e administratës së ish-Presidentit Donald Trump, i cili u përplas me OBSH për të njëjtën çështje. /tesheshi.com/
