Gjykimi në Hagë për Goran Haxhiqin qe pezulluar prillin e këtij viti për shkak të gjendjes së tij shëndetësore. Ai do të lirohej përkohësisht, i diagnostikuar me tumor në tru.
Por njeriu i bërë përgjegjës për masakrën e Vukovarit në vitin 1991 dhe për shpërnguljen e 20.000 njerëzve nga ky qytet nuk do t’i bënte ballë sëmundjes, duke ndërruar jetë ditën e djeshme në një spital të Novi Sadit.
57-vjeçari i shpëtoi kështu gjykimit në Hagë për krimet e tij. Ai do të arrestohej në vitin 2011, pas shtatë viteve në arrati.
Ai qe presidenti i republikës së vetëshpallur serbe të Krajinës, si dhe udhëhoqi fushatën për pengimin e pavarësimit të Kroacisë nga Jugosllavia.
Haxhiq do të qe në krye të forcave separatiste serbe në Kroaci në luftën në fillim të viteve ’90 të shekullit të shkuar. Ai u akuzua për vrasjen e joserbëve, për persekutim, për tortura e për shfarosje.
Goran Haxhiq do të cilësohej përgjegjës për vrasjen e rreth 300 meshkujve në Vukovar në vitin 1991 nga trupat serbokroate. /tesheshi.com/
