Në konferencën e shtypit të fundvitit të presidentit amerikan nuk mbetën jashtë vëmendjes dhe zhvillimet dramatike në Siri.
Barack Obama tha mes të tjerash se ndjehet përgjegjës për gjakderdhjen në Siri, e se administrata e tij ka shqyrtuar çdo mundësi për ta kufizuar dhunën atje.
“Unë gjithmonë ndjehem përgjegjës,” deklaroi presidenti amerikan në largim kur u pyet nëse ka ndjerë përgjegjësi morale për masakrën në Halep pas dështimit për të ndërhyrë në luftën civile siriane më herët.
“Jam ndjerë përgjegjës kur fëmijët janë qëlluar nga snajperët, kur miliona njerëz janë zhvendosur,” tha ai. “Ndjehem përgjegjës për vrasjet dhe kasaphanën që po kryhet në Sudanin Jugor, që nuk po raportohet… Ka vende rreth botës ku po ndodhin gjëra të tmerrshme. Dhe për shkak të detyrës sime, unë ndjehem përgjegjës.”
“Nuk ka një moment gjatë presidencës sime kur nuk kam ndjerë një pjesë të përgjegjësisë,” deklaroi Obama.
Presidenti më pas shpjegoi se ai dhe këshilltarët e tij kanë kaluar ditë dhe javë me takime në përpjekje për të gjetur një mënyrë për t’i lehtësuar vuajtjet dhe për t’i dhënë fund luftës civile siriane.
“Unë vazhdimisht kam ndjekur kursin më të mirë që kam mundur në përpjekje për t’i dhënë fund luftës civile, duke pasur parasysh njëkohësisht interesat afatgjata të sigurisë kombëtare të Shteteve të Bashkuara,” ka vijuar presidenti i SHBA-së.
Obama vuri në dukje gjatë konferencës së shtypit se në takimet që ka patur me këshilltarët dhe zyrtarët në lidhje me Sirinë është bërë e qartë se do të duhej të vendosej një numër i madh trupash amerikane për të bërë një ndryshim në konflikt. Dhe pa mandat ligjor ndërkombëtar, në mungesë të mbështetjes nga Kongresi, si dhe me një prani ruse dhe iraniane në terren, Obama tha se trupat tokësore amerikane do të hasnin në probleme.
Presidenti përsëriti mbështetjen e tij për armëpushimin dhe evakuimin që po kryhet në Halep, në epiqendrën e luftës civile siriane gati gjashtëvjeçare. /tesheshi.com/
