Dy austriakë, një gjerman dhe një shtetas shqiptar i Maqedonisë Veriore, janë ata që humbën jetën të hënën në mbrëmje në zemër të Vjenës, gjatë një sulmi me armë zjarri të klasifikuar si terrorist, ku protagonist kryesor qe shqiptari nga Tetova me nënshtetësi austriake, Kujtim Fejzullai.
Ndërsa të plagosurit, 23 prej tyre, janë kryesisht austriakë, por midis tyre janë shtetas të Gjermanisë, Sllovakisë, Bosnjë, Luksemburgut dhe Afganistanit.
Tre persona janë ende në njësinë e kujdesit intensiv, por janë të qëndrueshëm, thanë spitalet e qytetit.
Kujtim Fejzullai, 20 vjeç, vrau dhe plagosi më shumë se 20 vetë në sulmin e asaj nate, para se të vritej dhe ai nga policia austriake.
Policia sllovake njoftoi të mërkurën se autoritetet në Bratislavë kishin paralajmëruar Austrinë për faktin se Fejzullai u përpoq të blinte municione në vendin e tyre.
“Policia sllovake u informua këtë verë se njerëz të dyshimtë nga Austria po përpiqeshin të blinin municione në Sllovaki. Sidoqoftë, ata nuk arritën të bënin blerje,” njoftoi administrata e policisë sllovake në Facebook.
Ajo gjithashtu deklaroi se raporti u dërgua menjëherë në policinë austriake.
Autoritetet zvicerane nga ana e tyre konfirmuan të mërkurën se dy persona të arrestuar pranë Cyrihut ishin “padyshim miq” të sulmuesve nga Vjena dhe thanë se policia po hetonte natyrën e marrëdhënies së tyre.
Dy të rinj, të moshës 18 dhe 24 vjeç, u arrestuan të martën në qytetin verior të Zvicrës, Ëinterthur.
Policia austriake ka arrestuar 14 persona ndërsa përpiqeshin të përcaktonin nëse Fejzullai kishte ndihmës. /tesheshi.com/
