Në çdo rast tjetër, kryeministri Rama nuk do ia kishte lënë pa ia kthyer reston, asaj me të cilën shkon si macja me miun, kryebashkiakes Voltana Ademi. Por dy ditë më parë nuk e bëri, atë që në fakt e ka bërë rregullisht vitet e fundit, replikimin me gruan demokrate që drejton Shkodrën. Kjo e fundit i çoi një mesazh, me ngarkesë politike padyshim, por dhe ngashnjim njerëzor, pas vrasjes së radhës në qytetin verior, që për ironi qëlloi të ishte dhe vëllai i një deputeteje, Mirela Ferracakut, Arjan Ferracaku 31-vjeç, ekzekutuar me breshëri plumbash teksa kalëronte nën adrenalinën e një të apasionuari pas kuajve. Pas fjalëve të saj pasoi heshtja; Rama nuk iu përgjigj, ashtu siç mazhoranca nuk ka reaguar fare ndaj akuzave të opozitës për lidhjen e saj me bandën famëkeqe të Shkodrës.
Policia po heton, në një teatralitet të diktuar nga politika, sepse është e vërtetë ajo që thotë opozita, e gjitha Shkodra e di se kush e ka vrarë, siç e di se Ferracaku është vrarë gabimisht i ngatërruar me djalin e hallës, për shkak të ngjashmërisë së madhe.
Po, e gjitha Shkodra e di qartazi, si të ishte një polici profesioniste, se kush po vret e terrorizon Shkodrën. Bëhet fjalë për atë lloj bande, cituar qartazi nga opozita me mbiemrin e familjes që përfaqson, e cila e ka qendrën në Dobraç dhe kokën në Belgjikë.
Por a ka dhe përkrahje politike? Pa dyshim. Edhe sikur të mos dihen detaje të veçanta, siç një vizitë e ish-ministrit Tahiri në familjen e tyre kur e ushtronte detyrën e kreut të Rendit, mjafton ajo që ndodh në sipërfaqe për të kuptuar se nuk mund të sharrosh njerëzit ditën për diell, të vësh tritol e gjoba, pa patur një mbështetje, pa patur këmbët në bazamente të forta politike.
Sepse si ka mundësi që të ketë një dështim kaq spektakolar të policisë ndaj një furie krimi në Shkodër? Si ka mundësi që ndërsa opinioni i atyshëm i di autorët e kësaj furie si ti ketë para syve, policia bën të vështirën për t’i gjetur? Dhe bëhet fjalë për të gjitha vrasjet e tre muajve të fundit në Shkodër, të cilat janë produkt i luftës mes dy fiseve me tipare bande, ngjashëm si në Elbasan me Çapjat dhe Çelajt.
Një pikëpyetje e madhe ka të bëjë dhe me raportimin ose komentet gazetareske. Ndërsa në rastin e Elbasanit ato gëlonin në çdo ekran, te Shkodra ka një stepje, një kalim në heshtje. Të paktën Artan Hoxha nuk ka hapur gojë deri më tani për Shkodrën.
Ndërkohë, ministri i heshtur i Rendit, Fatmir Xhafaj, që deri pak kohë më parë twett-onte përbetime në emër të Forcës së Ligjit, apo që zotohej në ca bashkëbisedime qytetare se do e detyronte krimin të gjente “vrimë ku të futej”, ka mbledhur vartësit e tij duke i kërcënuar me ndëshkim për çfarë po ndodh në Shkodër. Do ishte më e gëlltitshme të bëhej fjalë për paaftësi se sa për teatralitet. Dhe në emër të së parës, nëse vërtet është vetëm ajo, ai duhet të japë dorëheqjen. Shkodra është dështimi më i dhimbshëm dhe më spektakolar i tij në krye të Rendit.
Ndërsa kryeministri Rama, prej këtej e tutje, duhet të gjykohet vetëm nga ajo çfarë po ndodh në Shkodër dhe me krimin në përgjithësi. Edhe ndonjë mbrothësi ekonomike që mund të sjellë – askund në horizont deri më tani – nuk ka asnjë vlerë përballë mbjelljes së pasigurisë, shumë më e rëndë se mbjellja e hashashit lart e poshtë, apo se mbjellja e dëshpërimit kolektiv se “ky vend nuk bëhet”. /tesheshi.com/
