Për situatën e rëndë në Maqedoni ka reaguar dhe kryeministri Rama. Ai fillimisht ka bërë thirrje që shqiptarët të ruajnë qetësinë e mos bien preh e provokimeve.
“Një bllokim krejtësisht i pakuptueshëm në Maqedoni i një procesi politik. Ajo që dua të them me këmbëngulje është që shqiptarët në Maqedoni duhet të ruajnë qetësinë dhe të mos bien pre e provokimeve. Duhet të jenë shembulli se si ne të gjithë si shqiptarë, nuk duam fundin, por stabilitetin dhe demokratizimin e Maqedonisë, ku shqiptarët të jenë me të drejta të barabarta me maqedonasit. Është vërtet dramatike. Është një moment ku realisht duhet qetësi”, tha Rama në Top Story.
Sakaq, kryeministri shqiptar ka thënë se Gruevski – duke aluduar pra për të si shkaktarin e kësaj situate – në fillim e pranoi Platrormën Shqiptare, por humbja e pushtetit e bëri të ndryshojë mendim.
“Me vjen keq që u ngrit një strategji dritshkurtër politike duke vënë shqiptarët në shenjestër dhe duke bërë sebep platformën e ashtuquajtur të Tiranës. E vërteta është se Gruevski e ka pranuar platformën shqiptare dhe e refuzoi vetëm kur Ahmeti arriti marreveshjen me Zaev”, tha Rama. /tesheshi.com/
