Në përvjetorin e radhës së ngjarjes së rëndë të 21 Janarit 2011, ku gjatë një proteste të dhunshme opozitare mbetën të vrarë nga armët e Gardës katër protestues, nga kryeministri Rama u kërkua sërish drejtësi nga Drejtësia e re, referuar dhe një vendimi të Gjykatës së Strasburgut, dhënë së fundi për vrasjen e Aleks Nikajt, duke diktuar rihetim.
“Vendimi kuptimplotë i Gjykatës Evropiane të të Drejtave të Njeriut, i cili e cilëson 21 janarin, e zeza mbi të
bardhë, si krim shtetëror të pa hetuar, duke u bërë kështu i pamundur të lexohet me dy kuptime, sipas dëshirës së kërkuesve të drejtësisë për 21 janarin, këtu në këtë rreth të pandashëm kujtese dhe në shoqërinë shqiptare, apo dëshirës së mbytësve të drejtësisë për 21 janarin në politikën shqiptare dhe në Prokurorinë e rrethit gjyqësor të Tiranës”, tha Rama.
Ai i përcolli një mesazh të nënkuptuar SPAK-ut për ta rihetuar 21 janarin e përgjakshëm më sfond politik, si një krim shtetëror, duke e quajtur atë si “shenjë të zgjimit të Drejtësisë”.
Kjo pasi më 27 shkurt, Gjykata e Lartë do të vendosë nëse do të pranojë kërkesën e familjarëve që dosja të hetohet në SPAK e GJKKO, dy institucione, që siç tha Rama, “kanë shprehur vullnetin për të goditur drejt, lart, pa duart e lidhura nga pushteti politik, dhe pa frikë nga dordolecët politikë”.
“Ne sot nuk ka mbetet veçse të shpresojmë që Gjykata e Lartë do vendosë me drejtësi me 27 shkurt dhe do të lëvizë barrën e rëndë të 21 janarin nga kurrizi pa shtyllë i Prokurorisë Tiranë në duart e SPAK për të hetuar cka krejt është shkruar qartë në vendimin e asaj gjykate, asgjë më shumë, asgjë më pak. Pastaj për ta çuar rezultatin e atij hetimi në duart e gjykatës së SPAK, ku më në fund Shqipëria dhe shqiptarët do mund të shohin nën dritën e diellit ata që duhet të përgjigjen për 21 janarin”, tha Rama, duke i dhënë një goditje të rëndë në brez atyre që kanë hetuar apo gjykuar deri më tani 21 Janarin, më saktë Prokurorinë dhe Gjykatën e Tiranës.
Dhe kjo sipas tij tregon se vettingu nuk ka funksionuar siç duhet. Ndaj, nga ministri Manja u tha:“Fakti që sot pas 13 vitesh drejtësia për 21 Janarin si krim shtetëror është ende në ajër, tregon qartë se brenda sistemit të drejtësisë ka magjistratë me çertifikatë vetingu të paaftë profesionalisht që punojnë me mentalitetin e vjetër të mbylljes së dosjeve me procedurë apo skadim të afateve të procedimit se kanë frikë të përballen me hetimin e dosjeve të rëndësishme”. /tesheshi.com/
