Një sulm ka ndodhur sot në xhaminë e njohur të Rrugës së Kavajës në Tiranë, ndryshe “Dine Hoxha”.
Shtetasi Rudolf Nikolli ka hyrë me një thikë në xhami dhe ka sulmuar disa besimtarë të ndodhur brenda, duke sjellë si pasojë plagosjen e rreth 5-6 prej tyre.
Ai më pas është neutralizuar nga besimtarë të tjerë si dhe nga efektivë policorë që kanë mbërritur menjëherë në vendngjarje.
Deklarata e Policisë thotë:
“Rreth orës 14:30, në Rrugën e Kavajës, një shtetas është futur në ambientet e një kulti fetar (xhami) dhe në rrethana ende të paqarta ka plagosur me mjet prerës 5 shtetas.
Falë reagimit profesional dhe të menjëhershëm të shërbimeve të Policisë është bërë i mundur neutralizimi dhe prangosja e autorit të dyshuar, shtetasi Rudolf Nikolli 34 vjeç, nga Burreli, i cili po shoqërohet në ambientet e Drejtorisë Vendore të Policisë Tiranë, për veprime të mëtejshme.
Ndërkohë, shërbimet e Policisë iu kanë dhënë ndihmën e parë shtetasve të lënduar, të cilët janë transportuar në spital, për ndihmë mjekësore dhe ndodhen jashtë rrezikut për jetën Në vendngjarje ka mbërritur grupi hetimor dhe nën drejtimin e Prokurorisë vijon puna për sqarimin e rrethanave dhe dokumentimin e plotë ligjor të ngjarjes”.
Imami i njohur i kësaj xhamie, Ahmet Kalaja, tha se shpresohet të ketë qenë një person ndoshta me të meta e jo ndonjë që ka tentuar një akt terrorist.
Sot pas dreke andej nga ora 2 ka ndodhur një akt barbarie pranë xhamisë ‘Dine Hoxha’ ku një njeri i armatosur me thikë godet besimtarët. Po nuk mjaftohet vetëm me besimtarët por godet dhe njerëzit në rrugë. Ai është arrestuar. Situata është nën kontroll. Të plagosurit janë në spital, shpresojmë të mos ketë qenë ndonjë akt terrorist por të ketë qenë një person me të meta mendore.
Janë plagosur disa nga stafi i xhamisë dhe disa besimtarë që kanë qenë duke adhuruar Zotin në ato momente. Personi në fjalë të marrë atë që meriton”, tha imam Ahmet Kalaja.
Ai shtoi se ky sulm i paprecedentë ndodhë pikërisht në muajin e shenjtë të Ramazanit për besimtarët muslimanë e se përveë cenimit të jetëve të pafajshme të tyre, cenon gjithashtu dhe atmosferën e një paqeje sociale që ekziston në vatrat e besimit e bashkëjetesës fetare. /tesheshi.com/
