Ambasadori amerikan në Korenë e Jugut, Mark Lippert, u gjakos ndërsa u sulmua me thikë në një aktivitet në një qendër artesh në Seul.
Sulmi ndodhi gjatë një konference mëngjesi, teksa ambasadori po përgatitej të mbante një leksion mbi mundësitë për paqe në Gadishullin Korean të ndarë. Përfaqësuesi i shtetit amerikan u ça në fytyrë dhe në kyçin e dorës, e u shfaq i mbuluar në gjak. Gjendja e tij është e qëndrueshme pas ndërhyrjes në një spital të Seulit.
I dyshuari u ndalua menjëherë në vendin e ngjarjes. I identifikuar si Kim Ki-Jong, i moshës 55 vjeç, agresori po çirrej me slogane kundër luftës kur ndërmori aktin ndaj zyrtarit amerikan. Ai nuk ishte i panjohur për policinë. I njëjti person kishte qëlluar me gurë në 2010-n ambasadorin japonez në Seul. Burimet bënë të ditur se Kim-i është drejtuesi i një organizate relativisht të vogël civile që bën thirrje për paqe dhe pajtim me Korenë e Veriut.
Shtetet e Bashkuara dhe Koreja e Jugut nisën këtë javë manovrat e përbashkëta ushtarake të përvitshme, duke nxitur një rritje të tensioneve me Korenë e Veriut. Në Korenë e Jugut ka një prani të përhershme të forcave amerikane, te rreth 30.000 trupa.
Lippert-i, një ndihmës për çështjet aziatike i sekretarit amerikan të mbrojtjes, e mori postin e ambasadorit tetorin e vitit të shkuar. /tesheshi.com/
