Nga Blendi Gashi
Qeveria e Kosovës përmes ministres për dialog Edita Tahiri, të enjten mbrëma doli me një deklaratë ku informoi opinionin publik se në bisedimet që po zhvillohen në Bruksel me Serbinë, pas rreth 9 orësh intensive me ndërmjetësimin e Bashkimit Evropian, është arritur marrëveshje për reciprocitet të plotë për targat e veturave në mes të Republikës së Kosovës dhe Serbisë, dhe heqjen nga përdorimi të tabelave “prova” të cilat njëanshëm zbatoheshin nga pala Serbe që nga viti 2011.
Marrëveshjen në fjalë, tha Tahiri do të kontribuojë për lehtësimin e lëvizjes së lirë të qytetarëve dhe automjeteve, ndërsa shtoi se zbatimi do të fillojë menjëherë sapo të dy shtetet të bëjnë përgatitjet teknike që lidhen me këtë çështje; e modeli që do të aplikohet bazohet në atë mes të Greqisë dhe Maqedonisë, ku dallimi është mes letërtngjitëseve për tabelat e veturave të të dyja shteteve.
Po ashtu, në këtë takim është diskutuar për planin e heqjes nga qarkullimi të tabelave të mbetura ilegale që qarkullojnë aty-këtu në veri të vendit.
Por, kjo deklaratë e lëshuar nga ministrja Tahiri del të jetë një e pavërtetë e madhe, pasi pala serbe dhe BE mohuan arritjen e marrëveshjes për targat.
Drejtori i së ashtuqujturës Zyrë për Kosovë, Marko Gjuriç, ka demantuar Tahirin duke thënë se nuk ka marrëveshje në mes të dy palëve për çështjen e targave, dhe se sipas tij do të jetë e vështirë për shkak së është rënduar “klima e pafavorshme në dialogun mes Beogradit dhe Prishtinës”.
Por Tahiri nuk është demantuar vetëm nga Gjuriçi, por edhe nga zëdhënësja e përfaqësueses së lartë të BE-së, Maja Kocijançiç duke thënë se në bisedimet ndërmjet Prishtinës dhe Beogradit në Bruksel, nuk është arritur marrëveshja për tabelat e veturave.
“Po bisedohet për këtë, por janë të nevojshme përpjekje dhe bisedime shtesë”, ka thënë Kocijançiq, në një prononcim dhënë për radio “Evropa e Lirë”.
Përkundër deklarimeve edhe nga zyrtarët e BE-së se, ministrja Tahiri në deklarimet që ka bërë për mediat ka insistuar se marrëveshja është arritur.
E pyetur rreth deklaratës së Maja Kocijançiç, Tahiri theksoi se “ajo që ka menduar zonja Kocijançiç është se kjo marrëveshje ka edhe çështje tjera të cilat do të bisedohen në fillim të javës tjetër dhe njëra prej tyre është heqja e tabelave ilegale që qarkullojnë ende në pjesën veriore të Kosovës, dhe me gjasë ajo ka menduar se kur të gjitha çështjet të arrihen pra ajo do të quhet marrëveshje e plotë”.
Pra, shtrohet pyetja pse të dalë qeveria e Kosovës përmes ministres Tahiri me një deklaratë të ngutshme dhe të pavërtetë?!
Lekaj: Edita Tahiri duhet të largohet
Opozita kosovare thotë se rasti në fjalë është dëshmia më e mirë se ministrja për Dialog, thotë në vazhdimësi të pavërteta.
Shefi i grupit parlamentar të AAK-së, Pal Lekaj, duke komentuar deklarimet pro dhe kundër marrëveshjes për targat, thotë se kjo është një dëshmi e madhe se dialogu me Serbinë duhet ndërpritet, sepse sipas tij, udhëhiqet nga njerëz që janë të interesuar të marrin veç pagat dhe mëditjet.
“Qeveri hajgare, Edita e q’thurur! Demantimi nga Maja Kocijançiq ndaj Edita Tahirit lidhur me marrëveshjen për njohjen e tabelave të makinave, është edhe një dëshmi tjetër se si zonja ‘marrëveshje’ në vazhdimësi thotë gjëra të pavërteta vetëm e vetëm për vazhduar dialogu, tashmë abuziv, me Serbinë. Përveç meditjeve, pagave të majme e sorollatjeve të Edita Tahirit, Kosova nuk e ka asnjë përfitim nga vazhdimi i këtij modeli të bisedimeve”, thotë Lekaj, për tesheshi.com.
Lekaj më tej shton se koha është që bisedimet me Serbinë të ndërpriten e të bëhet një strategji e qartë se si do të dukeshin në të ardhmen për gjërat bilaterale në mes dy shteteve të cilat duhet ta njohin njëra-tjetrën.
“Zonja ‘Marrëveshje’ (Edita Tahiri) duhet të shkojë në shtëpi e të mos vazhdojë të na paraqitet si një negociatore e arrirë, sepse ajo emertimin me ‘z’ edhe mund ta ketë, por me shumë e ‘zorit’ se sa e ‘zonja’”, thotë deputeti Lekaj.
Ndërkohë, bisedimet për targat mes delegacionit të Kosovës dhe Serbisë do të vazhdojnë javën e ardhshme. /tesheshi.com/
